Nizan hmasa a boral Dampa Bialtu MLA Lalrintluanga Sailo Vawiin-ah vuiliam a ni dawn

Nizan hmasa-a New Delhi-a boral Mizoram Legislative Assembly-a Member nilai leh MNF Legislature Party Leader Lalrintluanga Sailo ruang chu nimin khan Aizawl rawn thlenpui a ni a, Vawiin-ah vuiliam a ni ang.

Kum 65-a upa Lalrintluanga Sailo hi a khawsik a nasat avangin June ni 29 khan Delhi panpui a ni a, Max Hospital-ah ni khat Ward-a a awm hnuah ICU-ah dahluh a ni a, Rannung seh tih hmuhchhuah a ni bawk a. A natna hian a taksa peng thenkhat a lo tihchhiat nasat hman deuh avangin hun rei tak enkawl zui niin Ventilator te hmanga enkawl ni mah se nizan hmasa dar 9:00 vel khan a boral zui a. Damdawi In-ah hian Mizoram sawrkara Home Minister K. Sapdanga leh Assembly Speaker Lalbiakzama bakah Rajya Sabha MP K. Vanlalvena leh Lok Sabha MP Richard Vanlalhmangaiha bakah mi thahnem takin an buaipui nghal a ni.

Lalrintluanga ruang hi nimin khan Delhi atangin Aizawl rawn thlenpui a ni a, Lengpui Airport-ah sawrkar mi pawimawh leh party mi thahnem tak bakah chhung leh khat ten an lo hmuak a, nimin vek khan an chenna In, Luangmual Phunchawng Veng thlenpui a ni a, nizan lamah a ruang hi lumenin Vawiin chhun dar 12:00 hian vuiliam a ni ang.

Kum 1960-a piang Dampa Bialtu MLA Lalrintluanga Sailo hian kum 1976 khan kum 16 mi niin MNF a zawm a, Hnam Sipai-ah tangin kum 10 zet ram tan a rammut hnuah Remna avangin a rawn kir a. MNF-ah awm zuiin kum 1990 atanga 2002 thleng Luangmual Village Council President a nih bakah Branch YMA President leh chanvo dang te pawh a lo chelh tawh thin a ni. Kum 2018 MLA Inthlanpui-ah khan Dampa Bial atangin tlantlin a ni a, MNF sawrkar-ah khan Deputy Govt. Chief Whip niin kum 2023 inthlanpui ah a Bial ngai atang hian thlantlin leh a ni a, a boral thleng hian MLA a ni. Lalrintluanga Sailo hi May 9, 1986 khan Lalbiakthuami nen inneiin fa panga, mipa pathum leh hmeichhia pahnih an nei a ni.

Mizoram Larsap Gen. (Rtd) Vijay Kumar Singh leh Chief Minister Lalduhoma bakah Political party hrang hrangte chuan Lalrintluanga Sailo an ui thu hi an sawi a, Larsap chuan Lalrintluanga Sailo thi chu an ui takzet tih sawiin, a chhungte a tawrhpui thu leh Mizoram tana a hnathawh te an hre reng tawh dawn tih a sawi a. Chief Minister Lalduhoma chuan Lalrintluanga Sailo chu an ui takzet tih sawiin, Legislator tha leh taima, thusawi thiam leh Debater ropui an chan chu pawi a tih thu a sawi a, Sawrkar pawhin a tihtur apiang a ti zel dawn tih a sawi.

Mizoram-a Political Party hrang hrangte pawhin Dampa Bialtu MLA Lalrintluanga Sailo boral chu an ui thu thuchhuah siamin an tarlang a, a kalsan tak a nupui leh fanau te an tawrhpui thu an sawi bawk a ni.