Health Worker (Contractor) in lungawi loh lantir

Mizoram Contract Health Worker Association-te chu nimin khan Aizawl-a Chief Minister Bungalow kawt-ah lungawi lohna lantirin an pungkhawm a, sawrkar in Health Worker nghet mi 100 a lak turah NHM hnuaia Contract Health Worker mi 50 tal dahngheh an phut thu an sawi.

    Mizoram sawrkarin Health Worker Regular post 100, Direct Recruiment-a lak tura Advertisement a chhuahah sawrkar nena an indawrna ni lo anga thuthlukna siam a nih avangin siamtha leh tura phutin Mizoram Contract Health Worker Association te hi CM pisa Bunglow kawt-ah nimin khan an pungkhawm a, NHM hnuaia Health Worker hna hun rei tak lo thawk tawhte tan reservation dah an phut thu an tarlang a. Hemi chungchanga Sawrkarin thuthlukna siam chu hriatthiam har an tih thu sawiin, “Hun rei tak atanga kan lo nghah tawh leh kan lo beisei, Minister-te pawhin min lo sawi hmuh, Seniority anga a tahtawlha indahnghet tura kan ngaih laiin, tuna hetiang a ruahmanna a awm ta hi pawm harsa kan ti a ni,” an ti a. An duh leh beisei ang ngeiin sawrkarin Post 100 a lak turah mi 50 tal NHM hnuaia Contract Health Worker hna thawklaite dahnghet ngei turin an phut tlat tih an sawi bakah NHM hnuaia thawklai ten an dil ve ngei theih nan Computer Certificate nei lo leh kum over tawh, hun rei tak Mizoram hmun kilkhawr tak taka awm-a Computer zirna hun leh hmun pawh awm lo) te chu hrethiamin an dil ve theih dan tur sawrkar in ngaihtuah sak se an duh thu an sawi a ni. An hmalak zel dan tur chu Health Department hnuaia National Health Mission Employees Union (NEUM) awm an nih angin an hmalakna an ngaichang phawt dawn tih an sawi bawk.