Kawnpui - Sairang kawng chhe zual siam nan cheng nuai 100 ruahmanin hna tan nghal tum a ni

Kawnpui leh Sairang inkar kawngchhe zualpui hnawh nan sawrkarin cheng nuai 100 a ruahman a, nizan khan hna thawh tan nghal tura ruahman a ni.

Nimin khan Chief Minister Lalduhoma hovin Mizoram kawngchhe chungchang sawihoa thutkhawm a ni a, he hunah hian PWD Minister Vanlalhlana, PWD hotute leh Finance Department hotute telin Kawnpui - Buichali - Sairang kawngpui chu NHIDCL te kuta awm, State sawrkar mawhphurhna ni tawh lo ni mah se, nitin chak lakna pui ber a nih avangin nikum lama sawrkarin a lo hnawh tawh angin kumin ah pawh a zualpui hnawh leh mai nise an ti a. Hnathawh nan cheng nuai 100 an ruahman nghal a ni.

Hetihlai hian Mizoram Oil Tanker Drivers' Association (MOTDA) President Romel Lalruatdika chuan kawngchhia avanga an tuialhthei phurh an chawlhsan chu chhunzawm zui nise an ti tih a sawi a. MOTDA hian kar kalta Zirtawpni khan thuchhuah siamin Kawnpui atanga Sairang inkar kawng chhia chu Oil Tanker tlan nan a him loh avangin kawngchhia hi tlan theih pangngaia siam a nih hma chuan an lirthei din tir an tum thu an sawi a. MOTDA President chuan Vawiin hian kawngchhia chu a hmunah an pawl hruaituten tlawh an tum naa Fak Hlawh Lo Val Rual pawl ten kawngchhia chungchang sawiho turin pawl hrang hrangte an kohkhawm avangin an tlawh thei rih dawn loh tih a sawi a. Pawl hrang hrang kalkhawmin an rorel azirin an awm dan a danglam theih thu sawiin, hetihrual hian tun dinhmunah chuan tlan theihna tura kawng siam that a nih hma chu din rih an la tum thu a sawi a ni. 

Nimin-a Chief Minister hova thutkhawm ah hian Darlak - Tuidam inkar kawng chu a kawng thar zawk sialtu Contractor te an tlakchhiat avangin an contract tihtawp loh theih lohvin an awm thu tarlan a ni a. Tender thar chhuah dilna central sawrkarah a awm mek thu leh he dilna hi chak taka umzui mek a nih thu tarlan a ni a. A helna, kawng hlui, tuna hman mek chu PWD lamin a zualpui lo thawm tha se tiin cheng nuai 20 an ruahman a. Mamit - Bairabi kawngpui chu a Grade a tha na a khuar erawh a tam rih thu tarlan niin he kawngpui hi hman theiha a awm reng theih nan a tul lai apiang thawmthat nise an ti a. He kawngpui hi engemaw thulha Kolasib lam kawngpui a lo pin pawha hman theih niin a thawmthat nan cheng nuai 65 pekchhuahn an rel bawk.

Chief Minister ho a thukhawm hian kawngchhe thawm tura an rel te bawhzuitu tur Coordination Committee chu PWD Secretary kaihhruaina an din nghal a. Anni hian hmanraw mamawh te lakhawmin nizan angin hna an tan dawn a. NHIDCL lam pawh na zawka nawr nise, Central sawrkar ah pawh a tul anga hriattir nise an ti bawk.