Mizoram chu India rama khawtlang inlungrual leh inpumkhat tia hriat hlawh a nih thu Larsap in a sawi

Mizoram Larsap, General (Dr) Vijay Kumar Singh chuan Mizoram chu India rama khawtlang inlungrual leh inpumkhat tia hriat hlawh a nih thu sawiin, thalaite chu Mizoram mai bakah India ram hmalam hun atana beiseina meichher kengtu an nih thu a sawi.

Larsap, General (Dr) Vijay Kumar Singh hian nimin khan Govt. Aizawl North College (GANC)-a Red Cross Society bultanna hun chu khuallian nia hmanpuiin Govt. Aizawl North College-a Indian Red Cross Society Mizoram State Branch hmalakna bultan a ni chu lawmawm a tih thu a sawi a. Mizoram chu India rama khawtlang inlungrual leh inpumkhat tia hriat hlawh a nih thu leh Mizote nunphungah ngilneihna, inpekna leh tlawmngaihna te'n hmun thuk tak a chan thu a sawi a. “Thenawm khawveng inngaihsak tawn leh mamawh huna hnai reng thin khawtlang ni mah ila, khawvel hriat hlawh leh awmze nei taka pawl kalpui, Indian Red Cross Society kan neih belh thei hi a hluin hmasawnna min pek belhchhah dawn a ni,” tiin Red Cross Society hmalakna chu hleibik nei lo, inpekna thinlung puchunga mahni mihring puite rawngbawl sakna a nih thu a sawi.

Indian Red Cross Society (IRCS) President ni bawk General (Dr) Vijay Kumar Singh chuan tunhnaiah Mizorama Red Cross Society tharthawh a ni leh Youth Red Cross Unit-te College-a din chhoh mek zel a ni chu lawmawm a tih thu pawh sawiin, thalaite chu midangte tanpui tura che chhuak vat thei leh zirtir chhawng zung zung thei an nih avanga thlur bik an nih thu a sawi a. Zirna mai piah lamah Co-curricular activity hrang hranga inhman chuan mipuitling leh chhawrtlak ah zirlaite a chhuah thu a sawi a. Thalaite chu Mizoram mai bakah India ram hmalam hun atana beiseina meichher kengtu an ni tih pawh sawiin, First Aid pek dante zira chhiatrupna thlen thulha che chhuak thei turin a fuih a. Mizoram-a zirna In hrang hrangte chu Youth Red Cross Unit din theuh tur leh member-te zirtirna tha tak pek vek tum turin a chah a. Mizoram chu India ram puma Red Cross Model State ni tura tanlakpuiah kalkhawmte a sawm nghal a ni.

Govt. Aizawl North College (GANC)-a Red Cross Society bultanna hunah hian Larsap hian College Principal hnenah Institutional Membership Certificate, Oxygen Concentrator leh Blanket-te a hlan bakah mi 3 hnenah Life Member Certificate a hlan nghal a. IRCS Mizoram State Branch Secretary Dr. Chawnglungmuana chuan thu a sawi bakah Asst. Secretary Chinkhanmanga Thomte-in IRCS chanchin leh hmalaknate a sawi bawk a. He College-a Youth Red Cross Unit Member-te tan Basic Life Support (BLS) leh First Aid Training neih zui nghal a ni bawk.