CM’s Special Pakage atan Training neih mek zel a ni

The Mizoram Bana Kaih (Handholding) Scheme hnuaia CM Special Package atanga thawhpui tur (progress partner) te tan tunlai hian District hrang hrangah Orientation Training kalpui mek a ni.

CM Special Package atanga tanpuina dawng turte tana Training hi nimin khan Aizawl District-ah chuan Dawrpui Multipurpose Hall-ah neih niin Aizawl District chhunga hian Department 11 hnuaiah progress partners 467 an awm mek a, Mizoram District zingah Aizawl District hi Progress partners ngah ber a ni. Nimin a Training hi EF&CC Minister Lalthansanga chuan hmanpuiin CM’s Special Package dawngtu tur progress partners thlan kawngah Sawrkar a fimkhurin a duhtui hle a, kalphung thar, mipui sawrkar ah hmasawnna tak a thlen theih nan duhsak bik awm lo, thlei bik awm lovin mi rintlak, mi taima leh hlawhtling tura theihna neite chauh thlan-chhuah a nih thu leh politics a inrawlh loh thu a sawi a ni.

Khawzawl-ah pawh nimin khan DC Auditorium-ah Bana Kaih Scheme hnuaia Chief Minister's Special Package atana thlan thawhpui turte tana training hi neih a ni a, Khawzawl District-ah hian Department 7 nena thawkho turin mi 114 thlanchhuah an ni a, Department hotute chuan an Department hnuaia training telte hnenah Certificate an sem nghal a ni.

Mamit-ah pawh nimin khan LAD Conference Hall-ah Chief Minister Special Package, Bana Kaih scheme hnuaia Progress Partner te tan Orientation Training hi neih a ni a, Mamit District-ah hian Chief Minister’s Special Package dawngtu mi 128 awmin an zinga mi 43 te chu Soil Department hnuaia tanpuina dawng tur an ni a. Commerce & Industry Department hnuaiah mi 28, Horticulture hnuaiah 24, Fisheries-ah 16, AH&Vety-ah 13, Agriculture-ah 4 leh I&PR Department hnuaiah mi pakhat te an ni.