Hlawk zawka thlai hralhna ngaihtuah a ni tih sawi

Agriculture and Farmers' Welfare Minister PC. Vanlalruata chuan kan thlai tharchhuah sawng-bawl a, hlawk zawka hralh a nih theih dan tur ngaihtuah reng thu a sawi.

Agriculture Minister hian nimin khan Hnahthial District tlawhin an Department chan-a Pisa hrang hrang District Agriculture Office, School of Agricultural Sciences (SAS) leh Krishi Vigyan Kendra (KVK) te tlawhin an dinhmun a enfiah a, School of Agriculture Sciences (SAS)-a Zirlaite hmaah thu sawiin, Aizawl-a Agriculture Directorate tih loh ah chuan Hnahthial chu Agriculture Department tana hmun pawimawh tak a nih thu sawiin, “Keini Developing Country-ah hi chuan Agriculture hi kan innghahna a ni a, hemi avang hian Agriculture and Allied kan tih mai, Agriculture te, Horticulture te, Vety te, Sericulture leh Soil thlengin State innghahna, Livelihood a ni,” a ti.

Agriculture Minister chuan thiamna sang zawk leh hmanraw tha zawk hmanga loneih a tul tawh thu leh khawvel changkang chho zelah eizawnna kalphungte pawh a inthlak chho zel tih sawiin, Zirlaite chu Enterpreneuship lamah te pawh an la kal duh tur thu a sawi a, “Kan sawrkar hian kuthnathawktute lam a hawi tlat a ni. Kan thlai tharchhuah sawngbawl a, hlawk zawka hralh a nih theih dan tur pawh a ngaihtuah reng, kuthna-thawktute leh an thlai thar hralhna hi thlunzawm kan tum a ni,” a ti a. Hemi atan hian an zirna chu a tangkai tur thu a sawi a, theihtawp chhuah a, zir a, hlawhtlinna chang turin duhsakna a hlan bawk a ni.

Minister hian District Agriculture Office tlawh hmasa berin DAO thawktute chuan harsatna an leh mamawh an neih te an lo thlen a, SAS tlawh lehin hemi hnu hian KVK-a tlawh leh a, KVK-a thawktute chuan an hmalak dan hrang hrang a lem nen an lo hrilhfiah bawk a ni.