Aizawl Civil Hospital Trauma Care Facility hawng

Chief Minister Lalduhoma chuan nimin khan Civil Hospital Aizawl-ah Trauma Care Facility thar a hawng.

Civil Hospital Aizawl Trauma Care Facility hawnna hunah hian Chief Minister chuan Trauma Facility an hawng thei ta chu a lawm thu sawiin, “Hmasawnna chhinchhiahtlak a ni. A hming ang tak hian rikrum thila kan mamawh, nunna chhanna hmanhmawh thlak thawhna hmun a ni a, mi tin tana hmunhma tangkai a ni. A hlawhtlin theih nana mawhphurtute zawng zawng chungah lawmthu ka sawi,” a ti. Chief Minister chuan Aizawl Civil Hospital Block A leh Block B sak thatna tur chu PMJVK atangin cheng vbc. 88.33 ruahman a nih thu leh hna tan thuai a nih tur thu sawiin, “He Hospital-ah hian Lung zaina hmun te, Kal (Kidney) thlak theihna te, IVF tihna te dah kan rilruk a. Kan Doctor ten an thiam em em a, an mamawh facility hi kan pe lo ni mai zawkin kan hria. An mamawh hmunhma leh hmanruate hi chhawpsak a, phailam kan panna thin tam tak hi neih ve kan tum a ni,” a ti. Facility Centre chu tihchangtlun zel a ni dawn tih pawh sawiin, “A sir a hmuhma zim te, Health Department ta ni si lo pawh hi sawiho thain ka hria,” a ti a. Assam Rifles ram chhuahsana Aizawl Police Station dah a, tuna Police Station hi Civil Hospital zauh nana hman AR ram Advisory Committee-in a thuphunga a remtihsak thu a tarlang bawk.

He hun hi Health Department-a Commissioner & Secretary H. Lalengmawia chuan kaihruaiin Health Minister Lalrinpuii chuan Chief Minister Lalduhoma'n Health Department tana hma a lak nasat tawh dan leh an dil apiang a la pek deuh zel thu a tarlang a. “Hei hian Chief Minister-in kan ram mipuite hriselna a ngaihpawimawhzia a tilang a, sawrkar Hospital tihhmasawn hi mirethei zawkte tan bawk a lo hlut thin avangin mirethei zawk te hmakhua a ngaihzia a chiang hle a ni,” tiin Chief Minister chungah lawmthu a sawi a. H&ME Director Dr. SR Ngurchamliana chuan Technical Report a pe bawk a ni.

India sawrkar chuan ‘National Highway km 100 dan zelah Trauma Centre hi dah tur’ tih dan a nei a. Kawngpui (Highway) a chetsualna tawk te chuan darkar khat chhungin Trauma Centre an thleng hman tura ruahman niin Trauma Centre din dan tur duansa a awm a. Mizoram-ah hian Trauma Care Facilities hi Hospital 7 (pasarih)-ah din a ni ta a, Lawngtlai leh Lunglei tih loh a dang zawng chu an function vek tawh a ni.

Civil Hospital Aizawl-ah Trauma Care Facility hi a sakna turin sawrkar laipui atangin cheng nuai 121.50 dawn a ni a, State sawrkar sum cheng nuai 450 pek belh niin a building-ah hian Reception leh triaging area, Treatment area, Observation room, Imaging room (Xray/CT Scan) Minor OT/Resucsitation room leh Doctor/Staff room te a awm a, a chunglama zawm theih tura duan a ni bawk