MPCC in Bamboo Technology Park an enfiah

Mizoram Pradesh Congress Committee (MPCC) Treasurer Dr. Lalmalsawma Nghaka chuan Sairang-a Bamboo Technology Park chu hawn a nih hnuah kalpui chhunzawm loh a nih thu a sawi.

    MPCC Treasurer hian nimin khan Sairang-a Bamboo Technology Park hi tlawhin Mizoram sawrkar in kumin May 14 khan Sairang-ah cheng nuai 252.826 man Bamboo Technology Park a hawn thu leh he Project-ah hian mau atanga meihawl siam an tum bakah mau sawngbawl (seasoned)-a kum 50 thlenga dahthat theiha siam an tum thu a sawi a. “Sawrkar Press Release a an ziah dan chuan he Project hian nitin meihawl ton 3 a siamchhuak thei dawn a, kum khatah ton 9000 vel siamchhuah an tum a, mau pawh nitin pum 670 vel a mamawh anga chhut a ni. Chu chu ZPM Research Base a ni em ka hre lova, DPR pawh kan nei lo, mahse sawrkar PR-ah a inziah dan a ni. Research base-a kal tura intiam ten he plant hi an hawn rualin an kalpui zawm thei lo nghal hi thil mak tak a ni,” a ti a. He Meihawl siamna hmun ah hian an hawn lai vela hma an lak bak chhunzawm a awm miah loh thu pawh sawiin, “An meihawl siamchhuah lah hi a hnip em em a, a sawm nghal vek zel avangin helai Sairang-a thingpui dawr te pawhin hmantlak ah an ngai lo a ni,” a ti bawk.