Intihluihna a hlawhtling thei a nih loh thu sawi

Health & Family Welfare Minister Lalrinpuii chuan ram leh khawtlang hmasawnna tura sawrkar hmalakna te chu intihluihna hmanga hlawhtling thei a nih loh thu a sawi.

Nimin khan Planning & Programme Implementation Department chuan Aizawl-a Synod Conference Centre-ah Sam-poornata Abhiyaan – Samman Samaroh puala State Level chawimawina hun buatsaihin he hun hi Health Minister Lalrinpuii chuan khuallian niin a hmanpui a, Aspirational District leh Block ten hmasawnna hna hrang hrang an kalpui danah hmalakna chhenfakawm tak tak hmuh tur a awm thu sawiin, heng hmasawnna tha tak takte hi sawrkar lama thawktute avang chauh ni loin, a thawhpui Self Help Group, kuthnathawktute leh khawtlang anga lungrual taka hmalakna rah a nih thu a sawi a. Ram leh khawtlang hmasawnna tura Sawrkar hmalaknate chu intihluihna hmanga hlawhtling thei a nih loh thu sawiin, Aspirational District leh Block chawimawite atangin tanrualna leh thawhho thiamna piah lamah tuina tak tak nena hmalakna in hlawhtlinna a thlen dan a tihlan thu a sawi bawk.

Sampoornata Abhiyaan hi Niti Aayog in India rama hmasawnna chak zawka kalpui a nih theih nana District leh Block hnufual zawk a thlanchhuah - Aspirational Districts/Blocks-ah te ngawrh lehzuala sawrkar hmalakna kalpuina tura a ruahmanna a ni a, Mizorama Aspirational District awmchhun Mamit District chuan tehfung pathum tihhlawhtlingin ‘Copper’ hlan a ni a. Aspi-rational Block pathum zingah Ngopa RD Block chuan tehfung zawng zawng hlen kim vekin ‘Gold’ a la a. Block dang pahnih Lungsen RD Block leh Reiek RD Block te chuan tehfung paruk zinga pali chu hlenchhuakin ‘Bronze’ hlan an ni.

He hunah hian Chief Secretary Khilli Ram Meena leh P&PID Secretary Lalmalsawma Pachuau te pawhin thu an sawi a ni.