Tharchhuah hralhna tur sawiho

Loneituten an thil tharchhuah awlsam taka an hralh theih dan tur sawihoin nimin khan Serchhip ah District Export Promotion Committee chu an thukhawm.
He thutkhawm Serchhip DC Meeting Hall-a neih hi an Chairman leh Bawrhsap Paul L. Khuma chuan kaihruaiin Serchhip District chhunga cheng ten an thil tharchhuah leh siamchhuah hrang hrang te man man zawka an hralhchhuah theihna tura ruahmanna duang turin he thutkhawm hi neih a ni a. District Commerce and Industries Officer Lalchhanhimi chuan ruahmanna an lo duan chhin tawh te chu a lem nen entirin Serchhip District mipuite tharchhuah a bikin Hmarcha, Dragon Fruit, Balhla, Sawhthing leh Lakhuihthei te thawnchhuah dan tur an rel a, he hunah hian DoNER Ministry hnuaia North Eastern Region Agri-Commodity E-Connect (NE-RACE) aiawh te an tel bawk a ni.

NE-RACE hian portal leh smartphone app neiin Farmers Producer Organizations (FPOs) te, loneitute, Self-Help Group te, thei leh thlai sawng-bawlna Company te leh sumdawngte inziahluh theih a ni a. Serchhip District chhunga loneitute pawhin he apps hi an hman tangkai theih dan tur zawn nise tiin an rel a. Rawtna hrang hrang an neih te leh kum 5 kalta chhunga loneitute thlai tharchhuah leh hralh dan kalhmang (trend) thlir chunga ruahmanna thar siam nise, he ruahmanna hi August thla chhunga peihfelin thlirho leh nise an ti bawk.