Sawhthing tawih nia sawi leh Chief Minister Car man chungchang ZPM in an sawifiah

ZPM Party thupuangtu K. Laltluangkima chuan Sawhthing dah tawih nia sawi chu Sawhthing hralh tlak leh hralh tlak loh thliarna lama tha lo zual paih te niin a sawi.

Nimin-a Aizawl Press Club-a thuthar thehdarhtute a kawmna ah ZPM Spokesperson K. Laltluangkima chuan MPCC Spokesperson in July 24, 2025-a Sairang-a Sawhthing lei khawlsa dahna hmun a tlawh tuma ‘Sawhthing dah tawih’ a tih ho chu Sawhthing hralh tlak leh hralh tlak loh thliarna lama tha lo zual paih te an ni tih sawiin, “Thlai thar hi sawngbawl an ngai thin a, loneitute an a chhia leh a tha an dah pawlh chuan lo thenfai angai thin tih kan hriat vek kha,” a ti a. Sawhthing lei chungchang sawi zuiin, “Kan duhthusam chu kan thleng lo nain, loneitute hlimzia kan hmuh hian a zawngchhang thlak dawn hlein kan hria a. Mi pakhatin kum khat chhunga nuai 2, 3, 5, 8 te, nuai 10 han lalut te hi chuan NLUP leh SEDP kum 5 chhunga sing hnih emaw, nuai khat emaw hmu te hi chu an awh loh hmel khawp mai,” a ti bawk.

Chief Minister Car man chungchang pawh ZPM thupuangtu chuan sawiin, “Kan CM hian inthlan hma khan ‘ZPM Chief Minister chu car man to ah a thu dawn lo’ a ti a nih kha. Hei ZPM chuan CM chu kan han nei ta a. CM hlui car chu an chhawm ve ta a. He a car chhawm hi kum 15 vela upa tawh repair reng ngai kha anih tak avangin CM chu car thar Toyota leisak a ni ta a. Hetiang car hi a man nuai 20 vel atanga intanin chi hrang hrang a awm a, a to pawl chu nuai 32 vel a ni a. Hei hi tunlaiah chuan State khat CM chuanna atan chuan car pangngai mai a ni,” a ti a. Mizoram chu international ram depa awm kan nih avangin kan CM in Z+ Category Security a nei tih pawh sawiin, “Kan CM in campaign laia ‘Car man tovah a chuang lovang’ a tih hun lai nen khan thil a danglam nasa tawh hle a. Kawl ramah pawh Kawlho chang an do lova, Zo hnahthlak leh Zo hnahthlak te pawh an indo tawh a ni a, chutiang khawp chuan kan ram dep ho hi a ralti a; chutih lai kara Car man tlawm ber mai kan ram lal ber tana lo la hisappui tlat hi chu thil intu lo tak a ni tawh,” a ti a. “India sawrkar in CM tana a pek theih Security chu Z+ a ni a, PSO 3, Pilot personnel mi 15, Escord personnel mi 19 hmang reng thei a ni a. Chu chu amah hi chuan a hautak a tih avangin a duh lo zawk a. A tul a tih chuan bullet proof car pawh hmang thei a ni a. Chutih lai karah hetiang car satliah a a inhnukhniam thei hi chu fak mawlh mawlh tur zawk a ni dawn lawm ni?” tiin Chief Minister Car man chu a inang lo hlawm hle niin a sawi bawk.