MHIP in phu tawk hremna hmu ngei se an duh

Mizo Hmeichhe Insuihkhawm Pawl (MHIP) General Headquarters chuan tun thla ni 27-a rawng taka a pasal thattu a puh Lalremruati chuan a phu tawk hremna hmu ngei se an duh tih an sawi.

Nimin-a thuchhuah an siamah MHIP General Headquarters chuan tualthahna thleng chu pawi an ti takzet tih sawiin, Lalremruati'n a pasal Lal-chhuanawma (39) rawng taka a that chu an demin dan hnuaiah a phu tawk hremna hmu ngei se an duh tih an sawi a. MHIP chuan an Hmeichhiatpuite tana theihtawp an chhuah laia hetiang pawikhawihna Mizo hmeichhiaten an ti ta mai chu hriatthiam harsa an tih thu leh a pawi an ti takzet tih an sawi a. Tun chinah tuma chungah thleng tawh lo se an duh tih an sawi bawk.

Kulikawn Police Station Officer Incharge in a sawi danin, July ni 27, Pathianni-a Mission Vengthlang thualthahna thlengah tualthattu nia hriat hi a inpuang tawh a, man a ni tawh bawk a, Thawhtanni khan Court-ah Judicial Custody a dah turin hruai a ni a, he thil thleng hi chhui zui zel niin tun dinhmunah he tualthahnaa inhnamhnawih midang tumah an awm hriat a ni lo a ni.