Larsap leh Project Pushpak-a CE te an inkawm

Larsap General Vijay Kumar Singh chuan niminpiah khan Border Roads Organisation (BRO)-a Project Pushpak Chief Engineer GP. Singh chu Raj Bahvan-ah kawmin Mizoram-a Project Pushpak hmalakna hrang hrang a sawipui.

He inkawmna ah hian Project Pushpak-a Chief Engineer GP. Singh chuan ram venhim hna leh inkalpawhna tha siam kawnga Mizoram-a Project Pushpak hmalakna leh hmachhawpte bakah rawtnate an neihte Larsap hi a hrilhfiah a, Larsap chuan Project Pushpak hnuaia Project hrang hrangte leh rawtna thlente chu pawimawh a tih thu sawiin, chak zawka hmalak a nih theih nan sawrkar laipui leh State sawrkar thuneitute hnenah a tul anga bawhzuia, Approval leh Funding a awm theih nana hmalakpui a tum thu a sawi a ni.

He hunah hian Mizoram-a Project pawimawh tak tak paruk tarlan a ni a. Kawnpui-Durtlang-Aizawl (K-D-A) Road tihchangtlung a pawimawh thu leh MHA lama Fund bawhzui chak a tul thute, IMB (MHA) Road Work leh Fencing Work-te tan thei tura hemi kaihhnawih Land Acquisition (LA) leh Forest Clearance (FC) case-te chinfel thuai a tul thu te, Kawlchaw-Serkawr-Tuipang Road siam tura rawtna thlen a nih thu leh State Sawrkar atanga No Objection Certificate (NOC) nghah mek a nih thu te tarlan a ni a. Old Tualcheng-Pamchung Road sanction fel tawhah State Government atangin K-D-A road nena inthlakthleng awm lo tura NOC ngaihchan a nih thu leh DC atanga hnathawh phalna dil a nih thute, Kaladan Multi-Modal Transit Transport Project (KMMTTP) hnuaia package, 71 RCC (GREF), Lawngtlai te thawh tura pek chungchang leh hei hian hnathawh a tih chak phah dawn thu leh vilzui a awlsam phah dawn thu bakah Aizawl By-pass hnuaia package thenkhat Pushpak/BRO kuta hlan chungchangte sawifiahin Larsap hnenah hian thlen a ni bawk.