Car lei dan sawifiahna mipui hmuhsitna ah ngai

MNF-a General Secretary Lalremruata Chhangte chuan Chief Minister Lalduhoma’n sawrkar Dan dinglai pawt fan chung leh kuthnathawktute Sawhthing man tam tak la batsak mek chunga Car man to a lei thar a sawifiah tir dan chu Zoram mipuite hmuhsitna leh zahlohna nasa tak a nih thu a sawi.

Nimin-a Aizawl Press Club-a thuthar thehdarhtute a kawmnaah MNF General Secretary Lalremruata Chhangte chuan Chief Minister Lalduhoma’n inthlan campaign laia tum engemawzat mipui hmaa a thutiam leh ZPM sawrkar lakluh ni ngeiah pawh chanchinbumite hmaa a thusawi bawhchhiain kumin June ni 17 khan Car man to tak, cheng nuai 29 chuang man Toyota Innova Hycross a lei thar tih sawiin, a thutiam chiang taka a bawhchhiat avanga mipui lam atanga sawiselnaah ngaihdam dil a hneka July ni 29-a ZPM Party thupuangtu K. Laltluangkima hmanga a insawifiah dan chu Zoram mipuite engahmah a ngaih lohna leh hmuhsitna nasa tak a nih thu a sawi a. ZPM thupuangtu in thuthar thehdarhtute hnenah a sawi angin, CM car lei thar cheng nuai 30 vel lai man chu mi satliah car ang, hmeichhe khalh tawk, naupang football khel tur hruaina tawk angah Chief Minister Lalduhoma chuan a lo ngai a nih chuan car man to a tih chu cheng engzat man chin nge tih mipui hmaah sawifiah tel turin a phut thu a sawi bawk a ni.

MNF General Secretary Lalremruata Chhangte chuan Mizoram sawrkar Dan dinglai pawt fanin Chief Minister car lei phal man zat a tih danglam hnuah 'Sawrkar Motor lei thar reng reng a var emaw; off white emaw a ni tur a ni' tih a nih laiin a dum lei a nih thu pawh sawiin, Sawrkar motor reng reng mimal hminga register lovin, sawrkar hnathawkte designation anga register thin a nih laiin, tuna Chief Minister car lei thar chu mimal hminga register a nih leh zel avangin he Car thar lei dan hi a ngaihthat thlak loh a tih thu pawh a sawi a, Chief Minister chuan Kuthnathawktute Sawhthing man tam tak a la batsak mek bakah vheng vbc. tam tak ba nei tun chunga nuai 30 man vel Car 'a to lo' titlattu Chief Minister in kalphung thar kawng min zawhpui mek chu tlakranna kalphung, retheite rahbehna leh neksawrna kalphung mai a nih thu a sawi bawk.