World Hepatitis Day pualin hun hman a ni

World Hepatitis Day pualin nimin khan Civil Hospital Aizawl-ah hun hman a ni.

World Hepatitis Day pual hian Civil Hospital Aizawl-a Medicine OPD kawt-ah hun hman niin National Virus Hepatitis Control Program Nodal Officer Dr. Lalrothuama chuan Hepatitis natna awmzia sawifiahin he natna umbo beihpui hi kum 2019-ah Mizoram bikah neih tan a nih thu a sawi a, Hepatitis natna chu awmhona satliah-ah a inkaichhawn theih loh thu leh a veite pawh thinhrik mai lova tanpui zawk an tul thu a sawi a, Hepatitis natna neiten anmahni enkawltu Doctor-te thu an awih that a ngai tih sawiin, a enkawl dan pawh a veite’n natna an neih dan a zir a an thensawm thin thu a sawi bawk. 

Civil Hospital Aizawl Senior Medical Superintendent Dr. Lalchhuankimi pawhin thu sawiin, Hepatitis natna chu kum 2030-a umbo tum a nih thu te, Hepatitis damdawi chu Mizoram-ah pawh District Hospital tinah a thlawn liau liaua a veite pek an nih thin thu te a sawi a, kum 2030-a khawvel huapa Hepatitis umbo a nih theihna turin mi zawng zawng tawiawmna a pawimawh thu a sawi bawk. He ni pual hian Civil Hospital Aizawl chuan damlo inentir te tan thingpui an buatsaih sak bawk a ni.