Khualzin hipna atan thawnthu inphuahsiak nei

Serchhip District-a khualzinte hipna tura ‘Story telling Competition’ buatsaih kal mekah thawnthu ziak tha te hnena lawmman semna chu nimin khan neih niin August 5 khian thawnthu sawi tur thlanna neih leh a ni ang.
Mizoram Tourism leh Art & Culture Department tangkawp buatsaih khualzinte hipna tur Story telling Competition neih tura Serchhip District aiawh tur thlanna kalpui mekah hian a thawh khatna atan Serchhip Sub-Hqrs. YMA kaihhruaina hnuaiah Branch hrang hrangte ten ‘Thawnthu Inziahsiak’ chu buatsaih niin nimin khan Serchhip DC Meeting Hall-ah lawmman sem a ni a, he hun hi Bawrhsap Paul L. Khuma chuan kaihruaiin he intihsiakna ah hian mi 24 ten an thuziak an thehlut a ni. He intihsiakna ah hian ‘Tuichangral Lamah Aw’ tih ziaktu C. Sawidawla, East Lungdar Branch YMA chuan lawmman pakhatna dawngin ‘Tuichangral Lo Kai La’ tih ziaktu R. Lalfakawma, Rahsi Veng Branch YMA, North Vanlaiphai chuan lawmman pahnihna a dawng a. ‘Lo Zin Ve Rawh’ tih ziaktu Lalsangzeli, Khawlailung Bung-hmun Branch chuan lawmman pathumna dawngin midang 7 hnenah Consolation Prize pek a ni.

Heng thawnthu ziak atang hian August 8-a Mizoram pum huap Storytelling Competition-a Serchhip District aiawha a sawitu tur thlanna chu August 5, 2025 khian neih leh a ni dawn a, he hunah hian thupui thlansa pahnih atanga an duh zawk zawk thlangin mi panga (5) an inel anga, lawmman siam leh a ni ang.