Damdawi In 'Block A' sak hna thawh mek niin 'Block B' atan DPR buatsaih mek a ni bawk

Khum 100 awm theihna tur Serchhip District Hospital sak mekah Block A sak dan tur ruangan siamthat chu sum petu PGCIL chuan an pawm a nih chuan thawhhona thuthlung, Memorandum of Understanding (MoU) ziah a ni dawn a, Block B atan Concept Paper pawm fel tawh niin DPR buatsaih mek a ni bawk.

Nimin khan Serchhip DC Meeting Hall-ah khum 100 awm theihna tur Serchhip District Hospital sak mek chungchang chu Serchhip Bawrhsap Paul L. Khuma hovin sawiho a ni a, he thutkhawm ah hian Bawrhsap chuan Serchhip District mipuiten Hospital thar an mamawh tawhzia sawiin, a mawhphurtute chu mahni huang theuhah theihtawp chhuah turin a fuih a. Central leh State in an hmalakna te an vil reng thu leh Bialtu MLA leh Mizoram Chief Minister Lalduhoma pawhin Hospital sak mek hmasawn dan a ngaihven reng tih a sawi a. Serchhip District mipuite tana rotling, Hospital tha tak a rang thei ang bera sak zawh a nih theih nana tan la turin he huna kalkhawmte chu a chah a ni.

Serchhip District Hospital sak mek hi ‘Block-A’ leh ‘Block-B’ ah then niin Block A hi PGCIL te CSR Fund atangin cheng vbc. 21 senga sak mek a ni a. A sak dan tur ruangam siamthat a nih avangin PGCIL te pawm turin design thar hi thawn mek niin PGCIL hian Mizoram sawrkar-a zawhna hrang hrang an neih te chu Health Department-in a chhanna a thawn fel tawh a. PGCIL te hian an pawm a nih chuan thawhhona thuthlung, Memorandum of Understanding (MoU) ziakin chumi atanga thla 18 chhunga sak zawh hman tur a ni dawn a ni.

Tun dinhmunah Hospital hi a chhawng hnuai ber chhuat chhun zawh tawh niin 1st floor chhunna tur ban tung fel tawhin a beam chhun zawh a ni tawh bawk a, kar tawpah emaw, kar thar bul lamah emaw 1st floor hi chhun hman beisei a ni a. PWD chuan Hospital sak hna hi uluk takin an vil a, Contractor-te bungraw hman a tha tawk em tih finfiahna (test) a hun takah neiin tun thlengin Contractor te hian test hi an la paltlang thei zel tih Meeting-ah hian tarlan a ni. 

He huna tarlan a nih danin Block B hi DoNER Ministry hnuai North East Special Infrastructure Development Scheme (NESIDS) atanga sak a ni dawn a. Cheng vbc.50 senna tur Concept paper pawm fel tawh niin DPR buatsaih mek a ni bawk.