Thahnem ngai taka dik tak leh fel fai taka ni 100 inhlawhna kan kalpui a ngai - RD Minister

Rural Development & Administration Department changtu Minister Prof Lalnilawma chuan Mahatma Gandhi National Rural Employment Guarantee Scheme (MGNREGS) hnuaia inhlawhna chu a tak taka kalpui a, hna an thawk tak tak tihlan a tul thu sawiin, “Thahnem ngai taka dik tak leh fel fai taka ni 100 inhlawhna kan kalpui a ngai,” a ti.

Nimin-a a Pisa-a thuthar thehdarhtute a kawmna ah Minister Prof. Lalnilawma chuan kum 2005 khan National Rural Employment Guarantee Act chu India Sawrkar in siamin, thingtlang-a chhungtin te hnena ni 100 tal inhlawhna pek chu mipui techanvo (entitlement) ah a rawn siam thu sawiin, “Thingtlang mi tupawh Job Card nei, India khua leh tui, kum 18 tling chin chuan ni 100 inhlawhna ah hian a thawk thei a ni,” a ti a. Hemi rual hian mawhphurhna leh tihtur kan neih thu sawiin, “Ni 100 inhlawhna Scheme-ah hian, mipui inhlawh duh te chuan nikhatah darkar 8 (riat) tal hna an thawh a ngai a. Darkar 8 (riat) thawh tlin loh chuan nikhatah tun-a Wage rate hman mek, Rs.281/- hi an hlawh kim thei lo a ni,” a ti a. “Ministry chuan MGNREGA hnuaia inhlawhna hi a tak taka kalpui a, hna kan thawk tak tak a ni tih lan tir theihna tur Mobile Apps NMMS atangin hnathawh tan tirh leh ban dawn ah Attendance a capture vek turin State tin te thurawn a pe a. Hnathawh tan tirh a mihring 20 kan lan chuan hnathawh tan tirh a mihring 20 te vek kha ban dawnah NMMS hian a capture leh a ngai a. Mihring ngai vek an lan loh chuan reject tur niin, hnathawk lo ang ah kan awm dawn a, hlawh pawh kan nei thei dawn lo a ni,” a ti a. “BDO leh MGNREGA hnuaia VLAA, Technical Assistant, Barefoot Technician te leh Mates te bakah VC/VEC leh mipui ten hei hi palzam mai lo in, thahnem ngai taka dik tak leh fel fai taka ni 100 inhlawhna kan kalpui a ngai tak zet zet tawh a ni,” a ti bawk.

Ministry of Rural Development chuan NMMS hi ngai pawimawhin, he Mobile Apps atanga Attendance te hi ram pum huap a kalpui tur tiin, khawi State mah hi ngaihhnathiamna (exemption) an pe dawn lo tih Minister chuan sawiin, “Dik lo taka hnathawk leh attendance capture thin te lakah pawh Zero Tolerance Policy kan apply a, hre reng chung-a tisualtu chungah na taka action la turin State zawng zawng min rawn ti a ni.,” a ti.

Minister chuan Job Card chungchang pawh sawiin, “Tun dinhmun ah Mizoram-ah Job Card 2,12,517 a awm mek a, Heng Job Card nei chhungkua 212,517 atangin hnathawk thin (Workers) hi 2,33,536 awm bawkin, hmeichhe hnathawk thin (Workers) 120,276 an awm bawk,” a ti a. “Chhungkaw khatah pakhat chauh neih phal a ni a. Chhungkaw thuhmun atanga Job Card pakhat aia tam neih tum ten Ration Card an split tir thin tih te pawh hriat a ni a. Chhungkua, In danga cheng kan nih loh chuan Job Card hi chhungkaw khat atangin pakhat zel bak a neih theih loh tih hi mipui ten kan hriat thar leh a tha hle,” a ti.

MGNREGS hnuaiah Land Development chu mimal huan-ah an tih nasat thu leh Asset tha tak tak pawh an siam nasat thu Minister chuan sawiin, “MGNREGA hnuaia Land Development hna hi Cultivable Land ni lo, ram chhia leh kalsan tawh hmun te cheithat nana thawh tur a ni a. Mimal ram tha lai leh thlai chin nana hman lai ram te hi thawh phal a ni lo,” a ti a. “Mimal ram chhia leh ram bua te cultivable land a siam tura thawh sak bakah, mipui vantlang ten an chhawr tangkai theih tur Community Land Development lamah kan in thlurbing a ngai hle,” a ti bawk.

Kum kalta 2024-2025 chhung khan ni 100 inhlawhna siam theih a nih thu pawh Minister chuan sawiin, “Kumin Financial Year chhung pawhin ni 100 inhlawhna kan in pek theih ka beisei a. Tun dinhmun ah Wage Component atan cheng nuai 35326.15863 sanction min pe tawh a. Material Component atangin cheng nuai 2207 kan hmu tawh bawk,” a ti a ni.