Serchhip District VC Association hruaitu thlan a ni

Serchhip District Village Council Association hruaitu thlanna chu nimin khan Serchhip Kawn-pui VC Hall-ah neih niin Serchhip Kawnpui North VCP nilai, B. Vanlalsawma chu President atan thlan a ni.
Serchhip District VC Association hruaitu thlanna hi Serchhip District Local Administration Officer (DLAO) Dr. C. Vanlalchhanhimi chuan Returning Officer nia kaihruaiin tunhma lamin District VC Association inthlanna hi an neihpui ngai loh thu leh All Mizoram Village Council Association ten sawrkar-a rawtna an thlen angin District tinah inthlanna hi neihpui tura tih an nih angin he hun hi buatsaih a ni tih a sawi a. VC te chu khawtlang hruaitu an nih thu leh an pawimawh thu sawiin, an hlutna chu sawrkar in lawmman atana sum a pek thin atanga teh lo turin a chah a. District hmasawnna leh khawtlang thil pawimawh ah VC zawng zawng koh vek an remchan loh chang pawhin District VC Association te chu koh mai theih an nih dawn thu sawiin, sawrkar pawhin tangkai taka hman a tum thu a sawi a ni.

He hunah ah hian kum 5 chhunga Serchhip District VC Association President atan B. Vanlalsawma (Serchhip Kawnpui North VC) thlan a ni a; Vice President-ah TC. Lallala (Keitum VC); Secretary-ah Lalrinthuama Kawlni (Serchhip Vengchung VC); Asst. Secretary-ah C. Vanlalnghaka (Thenzawl East VC); Treasurer-ah H. Lalrawngbawla (Chhiahtlang South VC) leh Fin. Secretary-ah Lalrintluanga Pachuau (Baktawng VC) te thlan an ni bawk.

Inthlanna neih a nih hma hian VC Term kalta a District VC Association-a Secretary B. Vanlalngura kaihhruaiin an kalphung leh hmalak dan inhrilhfiahna neih a ni a, District VC Association chuan an Member te chhiat/that ah a theih anga an intuamhlawm thin thu sawiin, VC Term liamta ah khan VC Member leh Secretary boral mi 6 te Rs. 50,000/- theuha ralin, VC Tlangau, kangmei tuar chu Rs. 15,000/- a an tanpui thu tarlan a ni bawk.