Champhai-ah Sapthei chin beihpui thlak a ni dawn

Mission for Integrated Development of Horticulture (MIDH) Special Intervention hnuaia Champhai District-a Sapthei chin tur khuhhawnna chu nimin khan Horticulture Minister C. Lalsawivunga hovin neih a ni.

Champhai Bethel Veng-a Conservator of Forest Auditorium a hemi pual-a hun hman ah hian Horticulture Minister C. Lalsawivunga chuan Champhai District-ah MIDH Special Intervention hmanga Sapthei chin khuhhawnna neih a ni chu lawmawm a tih thu a sawi a, sawrkarin kuthnathawktute a ngaih pawimawh thu leh an intodelhna atana hmalakna tangkai tak a nih a beisei thu a sawi a. Kut hnathawktute chu fuihin tun hun mai ni lo, tu leh kan fate zel in an chhawr a, an lo intodelh a kan ram kan hnam a lo dinchhuah theihna turin an hmalakna turah rinawmna leh taimakna nen thahnem ngai taka thawk turin a sawm a ni.

India ram State dangah chin tam loh Sapthei hi Mizoram leilung, sik leh sa nen inmil tak a nih avangin District thlan bik- Aizawl, Serchhip, Khawzawl leh Champhai District-ah te Sawrkar chuan Sapthei chin kawngah nasa takin hma a la mek a. Champhai leh a chhehvel hi Zo boruak, Sapthei that duhna a nih avangin tun hma atangin Sapthei hi chin thin a ni a, tunah hian MIDH Special Intervention hmangin Horticulture Department chuan khaw thlan bik - Vaphai, Samthang, Hnahlan, Ngur, Champhai, Hmunhmeltha leh Ruantlang-ah te hmalak pui turin chhungkaw 150 thlangchhuakin hma an lakpui mek a. June thla khan Sapthei chin dan, enkawl zui dan leh Sapthei chinna hmanraw hman dan zirtirna an lo pe tawh a ni. Sapthei ching tur thlan te hnenah hian Sapthei tiak, Sapthei zamna hrui, Organic leitha (NPK), a zamna tur banril, a natna enkawlna damdawi (Wood Vinegar), a kahna (Sprayer) leh a tang tanna (secateur) te thlawnin an pe a, Sapthei tharte sawngbawlna turin Zote-ah Passion Fruit Processing Unit sak peih a ni tawh bawk a ni.

Horticulture Minister hian nimin zing khan Horticulture Department hnuaia New Champhai-a Warehouse-cum-Collection Centre, Manager Quarter leh Chowkidar Quarter sak leh Hmunhmeltha-a Warehouse-cum-Collection Centre te chu a hawng bawk a. Horticulture Complex-a project hi NABARD hnuaia sak niin September ni 25, 2024 khan sak tan a ni a, July ni 2, 2025 khan sak zawh a ni. He project atan hian cheng nuai 114.64 hman niin thlai MT 210 leng tura ngaih a ni bawk. Hmunhmeltha-a Warehouse-cum-Collection Centre hi September ni 18, 2024 khan sak tan niin May ni 16, 2025-ah sak zawh a ni a, cheng nuai 50.2 hman niin MT 210 leng tura ngaih a ni bawk. Minister hian nimin vek khan New Champhai-a Passionfruit Processing Unit sak mek te, Tlangsam-a Turmeric Processsing Unit leh Tlangsam-a Champhai Winery a tlawh bawk a ni.