NFSA kalpui dan thlirho

National Food Security Act 2013-in a phut angin nimin khan Khawzawl-ah District Vigilance Committee on Targeted Public Distribution chu a tum khatna atan an thukhawm a, he hunah hian Khawzawl District-a NFSA 2013 kalpui dan thlirho niin Member Secretary & DCSO CC. Sakhawliana’n report a pe a. NFSA 2013 hnuaia Ration Card pahnih - Antyodaya Anna Yojana (AAY) leh Priority Household (PHH) a sawifiah bakah NFSA-in a huam loh State Scheme Mizoram State Special Ration Package (MSSRP) leh Non-NFSA te pawh a sawifiah bawk. Heng bakah hian NFSA hnuaia raipuar (pregnant women) te, naupang thla 6 atanga kum 3 bakah kum 3 leh kum 6 inkar te hamthatna sawiho a ni a. Danin a phut angin an kalpui em tih enho zel nise an ti a. NFSA 2013 Section 15-in a phut angin mipui ten NFSA chungchanga an harsatna an thlen zung zungna tur District Grievance Redressal Officer (DGRO) chu sawrkarin a ruat tawh thu tarlan a ni bawk.