NCORD thutkhawm neih a ni

Serchhip District chhunga ruihhlo do kawnga hmalakna thlir leh hmalak zel dan tur ngaihtuahin nimin khan NCORD Meeting neih a ni.
Serchhip DC Meeting Hall-a NCORD Meeting hi District Bawrhsap Paul L. Khuma chuan kaihruaiin NCORD Member ten an hmalakna hrang hrang an tarlang a, Serchhip SP Gavit Gogna chuan tun tum Meeting leh Meeting hnuhnung ber inkara an hmalakna tarlangin, hemi chhung hian Heroin gram 14 an man thu leh thubuai pakhat ziahluh an neih thu a sawi a. July 11, 2025 khan Serchhip Police Station-ah ruihhlo man te hal niin Heroin gram 178, Ganja kg 2.92 leh Meth kg 3.88 an halral thu sawiin, heng te hi cheng nuai 55.88 hu a nih thu a sawi bawk a. Tunhnaiah Serchhip Police ten Sailiam-ah fertilizer tawlhru an man thu leh Agriculture Department kutah dah niin dan angin hma an la chhun-zawm dawn tih tarlan a ni bawk.

Hemi hun chhung hian Excise & Narcotics Department hian thubuai ziahluh 8 an neih thu an sawi bawk a. School Education Department chuan Zirna In 53-ah hrilhlawk lova naupang te bag an endik (surprise check) thin thu te, Awareness Campaign an neih thin thu te an sawi bakah August thla atangin an Curriculum-ah telhin ngawrh zawka ruihhlo that loh zia inzirtir an tum tih an sawi a. Health Department hian Hmuntha, Chhiah-tlang leh Chhingchhip-a damdawi dawr hrang hrang an endik thu sawi bawkin, an Drug license in a huam phak loh damdawi zuar ru an awm em tih an endik thu an sawi a ni.