Sawhthing leikhawl sa a tawih nasa tawh hle tih MPCC thupuangtu in a sawi

Mizoram Pradesh Congress Committee (MPCC) chuan Mizoram sawrkarin Sawhthing leisa a buaipui zui dan an enfiah thu sawiin, Sawhthing lei khawlsa hi a tawih nasa tawh hle niin an sawi.

MPCC Spokesperson Dr. Lallianchhunga chuan nimin July 24, 2025 khan Sairang-a Sawhthing dahkhawmna hmunpui tlawhin, Sawhthing an lei khawl sa Mizoram sawrkarin a buaipui zui dan a hmunah a en tih sawiin, “Sawhthing lei khawlsa hi a tawih nasa tawh hle a, chung Sawhthing tawih te chu hmun engemaw zatah paih khawm a ni a. Ruahsur in len bo nual tawh mah se Sawhthing tawih an paihna sulhnu erawh hmuh theih a la ni a. Road Map awm miah lova Sawhthing hi buaipui a ni tih a lang,” a ti a. “A hmunah vai hoin kg-ah Rs. 3 leh Rs. 5 ten an lei a, mutia ten bag 1-ah Rs. 10 hlawhin Motor-ah an dah lut thin a ni,” tiin “Mizoram sawrkarin Sawhthing a leikhawl hi thar beisei zat atangin zaa 15 (15.71%) vel chauh a ni a, tharchhuah tura beisei zat atangin zaa 84 chuang (84.29%) a lei hman lo tihna a ni a. ZPM sawrkar thil kalpui dan fuh lo avangin Sawhthing chingtute’n kg khat Rs.50 aia sangin Sawhthing an hralh theih loh phah a. Sawhthing lei danah ZPM sawrkar hian Sawhthing chingtute beisei a pha lo nasa hle a ni,” a ti.

MPCC Spokesperson Dr. Lallianchhunga chuan, “Tuna Sawhthinga kalpui dan buarchuar tak, kuthnathawktute ti beidawngtu hi ZPM sawrkar Road Map-ah a tel em?’ tih leh “Thlai thlanchhuah lei a nih danah hian Campaign laia an sawi uar tak Research Based a tih engmah a awm lo tihna a ni em?’ tih chu sawrkar zawtin, “Sumdawng ten inhralh har an tih chhan hi kuthnathawktute leh mipuite kuta sum a luh that tawk loh vang a ni ber a. Kuthnathawktute kutah sum lut tak tak selang chuan khawtual-ah sum lengvak a tam ngei tur a ni a, hai theih a ni lovang,” a ti a. “Contract hna inpek danah pawh mi pakhat hminga nuai 2000 chuang man Restricted Tender hna inpek a awm tih sawi a awm a. Hei hian ZPM sawrkar chu mi tlemte te hausakna tura mahni intiamna ngei pawh phatsan leh duh an ni tih a tilang chiang hle a. ZPM Minister te lah mawhphurhna la ngam tak tak lova midang puh thiam tak, Chemtatrawta Sawrkar dintute an ni a. Hetiang sawrkar hi tunhmain Mizoram in kan la hrawn ngai lo a ni,” a ti a. “Sawrkar nawn an tum tawh lova a lan avangin Congress party chu ZPM sawrkar thlaktu turin mipuiten beiseina nen min thlir mek a. Pathian Malsawmna leh mipuite duhsakna zara kan sawrkar chuan mawhphurhna la ngam sawrkar tha kan din ang,” a ti bawk.