Vawk thi tanpuina tur sum Bank-ah dahluh a ni tawh

African Swine Fever (ASF) avanga nikum (2024) chhunga Serchhip District-a Vawk thi neitute hnenah zangnadawmna pek tur sum chu Bank-ah dahluh ni tawhin Bank lamin an remchan veleh an pechhuak ang.
Serchhip DC Office atanga LENKAWL in thu a dawn danin nikum-a ASF avanga Serchhip District-a Vawk thi te zangnadawmna tur sum hi an dawn hnuah tan-puina dawng turte Bank Account enfiah hna hi kalpui nghal a ni a, sum ruahman sa dawng turte hi enfiah fel a nih hnuah sum pekchhuah turin Bank-ah dahluh a ni tawh a, Bank lam hian an remchan veleh tanpuina dawng turte Account-ah hian an thun tawh dawn a ni.

Serchhip DC Office-a thawktute chuan \anpuina sum an dawn hian nikum-a Vawk thi zawng zawngte a daih dawn loh thu an sawi a, hei vang hian la dawng lo leh dawng kim lo tur an awm dawn niin an sawi bawk.

Serchhip DVO Office atanga LENKAWL in thu a dawn danin nikum (2024) chhung khan ASF avang hian Serchhip District-a khaw 31-ah Vawk 3527 thiin Vawk 7069 suat a ni bawk a, ASF avanga Vawk thi leh suat hi a vaiin 10,596 niin chhungkaw 2127 ten Vawk hri leng hi an tuar a. Sawrkar in kaihhruaina a siam angin ASF avanga Vawk thi neitute hnenah hian State Disaster Response Fund (SDRF) atangin zangnadawmna hi pek theih a ni a, hei hi tunhma lama ASF avanga Vawk suat, sawrkar laipui atanga chhawmdawlna pek thin nen a inang lo a. State Disaster Response Fund (SDRF) kaltlang hian Vawk thi pakhat zelah Rs. 4000/- zel pek tur niin mi pakhat tan Vawk paruk (6) thlengin chhawmdawlna hi dawn theih a ni a, mi pakhat in Vawk paruk aia tam pawh chan mah se paruk chin bak hi pek theih a ni dawn lo a. Tun tumah hian May thla atanga October thla thlenga Vawk thi 3385 zinga Vawk 2713 neitute hnenah Rs. 1,08,52,000/- chu pek  tura ruahman a ni.