Mizoram-a Oil phurluttu ten nawrh titawpin tuialhthei harsatna a ziaawm chhoh beisei a ni

Mizoram chak lakna kawngpui chhia avanga Mizoram-a tuialhthei phur luttu Mizoram Oil Tanker Driver Association (MOTDA) ten an lirthei an tlan duh loh chu nimin tlai khan titawpin Mizoram-a tuialhthei harsatna thleng mek pawh ziaawm chho tura beisei a ni.

Kolasib District Bawrhsap Robert C. Lalhmangaiha chuan nimin khan MOTDA Hqrs. hruaitute chu Vairengte-a an Office-ah kawmin, Mizoram hmun hrang hrangah tuialhthei a harsat thu hrilhin, an nawrhna titawp turin a ngen bakah Mizoram-a tuialhthei phurtu Tank Lorry te chu load la tur leh load la a ding te pawh mipuite harsatna hriaa an nawrh bansan turin a ngen a. Kolasib Bawrhsap chuan, Tank Lorry Driver te chu nawrh an huaihawt avanga Mizoram mipuiten harsatna an tawh dan te hrilhin, sawrkarin Oil phurtu Tank Lorry te kal theihna tura hma a lak dan te a hrilhfiah bakah Tank Lorry driver kal turte pawh Driver Association lamin kal lo turin an vau bet tih sawiin, Mizoram lut tur Tank Lorry kawng laka tangkhang zawng zawng te chu nimin la la a kal turin a hriattir a, sawrkar thu zawm duh lo leh harsatna siam lui an awm chuan an chungah dan lekkawh a nih tur thu a hrilh nghal bawk a ni.

Hemi hnu hian Vairengte leh a chhehvela Tank Lorry ding mek paruk (6) te chu nimin tlai dar 3:30 khan Vairengte chhuahsanin Aizawl lam panin an chhuak nghal a, Silchar kawng lamah Tank Lorry tangkhang an awm leh awm loh Bawrhsap ho hian enfiah nghal a ni bawk a. Bawrhsap leh MOTDA hruaitute hi hun engemaw chen an in biak hnuah nimin khan MOTDA hian an nawrh hi an titawp ta a ni.

Mizoram Oil Tanker Driver Association (MOTDA) hian nimin vek khan thuchhuah siam nghalin kawng chhia avanga Oil Tanker te tlan rih loh an tih chu sawrkar in kawng chhe zualte a hnawh sak tak avang leh la tha tawk lo lai te pawh an hnawh chhoh zel dawn avangin nimin, July 25, 2025 tlai dar 4:00 atangin Oil Tanker te tlan leh tan nise an ti tih an tarlang a. Oil-a harsatna tawk mipui tam tak an awm avanga pawi an tih thu leh kawng him zawk an zawh theih nana lo tuartute pawhin an hriatthiam hram hram avanga an lawmthu an tarlang a ni. Hetianga kawng laka tangkhang Oil phurtute an tlan leh tak avang hian Mizoram-a tuialhthei harsatna thleng mek pawh ziaawm chho leh nghal mai tura beisei a ni.