Oil Tanker te la ding zui zel; JCM ten kawng en tum

Kawnpui leh Sairang inkar kawng chhia avanga an lirthei din tir mek Mizoram Oil Tanker Driver’s Association (MOTDA) te chuan an lirthei an la din tir chhunzawm zel.

Akashvani zawhna chhangin MOTDA President Romel Lalruatdika chuan kawng thawmtha turin Mizoram sawrkarin hma a la tan nia an hriat thu leh NHIDCL lam pawhin kawng siamna lung te an chhekkhawl tan nia an hriat thu a sawi a. Hetihrual hian a hmun ngeiah Vawiin ah emaw, naktuk-ah emaw hnathawh hi an enfiah dawn thu sawin, hemi hnuah hian kawng thawmthat a nih dan te thlir chungin an kal zel dan tur chu an la ngaihtuah leh dawn tih a sawi a ni.

Romel Lalruatdika chuan a tir atanga an tum angin kawng laka tangkhang tuialhthei rawn phur sa tawh Truck te chu dan an tum loh thu leh kawng-a tang tlem azawngin tuialhthei an lo phurhluh thu a sawi a. Tun dinhmunah Petrol Pump zingah tuialhthei nghei hmak tawh chu tlem azawng awm mahse heng lirthei lut tlem azawng leh stock lo neih avanga Coupon chauha lak theih nei te leh Petrol leh Diesel lak tur la nei erawh tlem azawng an awm thu an sawi a ni.

Hetihlai hian Kawnpui leh Sairang inkar kawngchhia chungchanga thuneitute darkar 48 nghaktu Joint Civil Society of Mizoram (JCM) hruaitute chuan helai kawng chungchang ah hian sawrkarin chet a la ta nia an hriat thu an sawi ve bawk a, JCM Secretary Dr Vanlalsiama Chhangte chuan JCM in sawrkar an nghah mek laiin sawrkar chuan kawng thawmthat nan cheng nuai 100 te dahin kawng siam hna pawh an thawk tana an hriat thu a sawi a. A hmaa an lo sawilan hnatlanga siam chungchang pawh sawrkarin chet a lak tak avangin a ngaih dawn leh dawn loh Vawiin ah a hmun ngeia an enfiah dawn thu leh hmalak zel dan an la ngaihtuah tur thu an sawi a ni.