Lungsen Block-ah damdawi In-a nau nei an pung

Aspirational Block Programme leh Project BLOOM (Better Living through Outreach, Optimal Maternal & Child Health) hmalakna hnuaiah Lungsen Aspirational Block huamchhungah damdawi In-a nau nei nasa takin an pung a, a tumkhat nan kumin June atanga July thla chhungin zaa 70-a kai a ni.

Lungsen RD Block chhunga damdawi In-a nau neih zat chu March 2023-a zaa 14.73 atangin Aspirational Block Programme hnuaia hmalakna kaltlangin March 2025-ah zaa 43.1-ah a kai chho a. June 2025-a Project BLOOM kalpui hnuah hmasawnna nasa zawk hmuh belh niin June atanga July 2025-ah chuan zaa 72.2-ah a kai chho tawh a ni. Lunglei District Lungsen RD Block chhunga hmasawnna hi Project BLOOM hnuaia nu nau paiin damdawi In ngeiah nau a neih theih nana inzirtirna te, a thlawna koh mai theih tur lirthei ‘Safe Womb Wheel' ruahman te, nau nei tur leh buaipuitute lo chawlh lailawkna Khualbuk ruahman te, raipuar zingah an naupai atanga thla thum (3) chhunga inziaklut (register)-te hnena 'BLOOM Gift Basket' pek te leh hmalakna dang dang rahchhuah nia ngaih a ni.

Heng bakah hian, Raipuarte'n enkawlna leh chawtha a hun taka an dawn theih nana naupai atanga thla thum chhunga inziahluh chungchang ah pawh hmasawnna hmuh niin nau pai tirh thla thum chhunga inziaklut March 2023-ah zaa 50.6 an awm laiin June atanga July 2025-ah chuan zaa 65.38-ah a pung chho tawh a ni.