Serchhip-ah PM-DAJGUA kalpui dan thlirlet

Serchhip District-a PM-DAJGUA kalpui dan thlirletna chu nimin khan Serchhip-ah District Bawrhsap Paul L. Khuma hovin neih a ni.

Serchhip DC Meeting Hall-a thlirletna hunah hian PM-DAJGUA kalpuitu Department hrang hrang - Rural Development, Health & Family Welfare, Commerce& Industries, Women & Child Development, Agriculture, Food Civil Supply & Consumers Affiars leh LAD ten Awareness Campaign an kalpui dan an tarlang a. June ni 15 atanga July ni 15, thla khat chhung khan Serchhip District chhunga khaw hrang hrangah kalkualin heng Department Official te hian mipuite tangkaipui theih tur Scheme leh hmalakna an neih te an hrilhfiah a. Nimin-a thutkhawm ah hian an hmalak dan leh DAJGUA avanga hmasawnna an neih te an tarlang bawk a ni.

DAJGUA Campaign an neih chhung hian Scheme hrang hranga inziaklut thar mi engmaw zat an awm a. Mipui ten an hriat loh te hrilhhriatna hun an neih thu leh hlawk taka hun hman a nih thu Department hotute hian an sawi a. Scheme hrang hranga inhrilhhriatna ‘Saturation Camp’ hi November thla thlenga la neih chhunzawm tur a nih avangin Department tin te chu an theih ang anga hma lo la chhunzawm tur te, an Data leh thlalak te Portal-ah a hun taka upload zel tur leh DC Office-ah kartin report thehlut thin tura ngen an ni bawk.