TKP dinchampha lawm

Nimin July 20, 2025 kha Baptist Kohhran (BCM) hnuaia thalai pawl, Thalai Kristian Pawl (TKP) dinchampha vawi 74-na a ni a, Mizoram pumah he ni pual hian hun hman a ni.
Kumin TKP Day-ah hian thupui atan ‘Danglam lo ringtu’ tih hman niin TKP Day hi kumtin urhsun taka hman thin a ni a. TKP Unit tam zawk chuan zingkarah khawtlang tana thil tha tiin vantlang hmun leh Biak In leh a chhehvel te an tifai a, nizan lamah MTKP atanga programme duansa angin Unit tinah TKP Day lawmna Inkhawm an nei bawk a ni. Kumin a TKP Day pual hian Unit thenkhat chu Biak In leh a chhehvel tifaiin an hnatlang a, thlanmual leh hmun hrang hrang tifai te awmin Unit tam ber chuan nizan khan hun an hmang bawk a, thalaite Krista hnungzuinaah chak zawka an kal theih dan tur te, Kohhran tana ban rinawm an nih chhoh zel theih nana inzirtir nan leh infuihthar nan te an hmang a ni.

TKP hi Presbytery (tuna Assembly ni ta)-in a phalsak angin kum 1952-a Inkhawmpui, Pukpui-a rorelnain TKP din rawtna chu pawmpuiin Pastor Bial-a din phalna pawh a pe nghal a. BCM Kohhran dinna hmun hrang hrangah Unit leh Bial TKP chu a lo ding ta a ni. MTKP-in an tarlan dan chuan Mizoram-a BCM Pastor Bial 92-ah TKP Unit 448 a awm a. TKP Member 50,364 awmin Mipa 30,562 leh Hmeichhia 19,802 an ni.