Serchhip District chhung thingtlang khuaa bawlhhlawh sawngbawl dan tur sawihona nei

Serchhip District chhung thingtlang khaw hrang hranga bawlhhlawh sawngbawl dan tur chungchanga inrawnkhawmna chu nimin khan Serchhip Bawrhsap Pisapui Hal-ah neih a ni.
PHE Department buatsaiha he inrawnkhawmna ah hian Serchhip District chhunga WATSAN Committee Chairman leh Secretary te telin he hun hmanpuitu Bawrhsap Paul L. Khuma chuan faina leh thianghlimna kawngah hma kan sawn theih nan kan khawtlang tana tha rel turin inrawnkhawmna hun buatsaih a ni tih a sawi a. Thingtlang khuaah bawlhhawlh sawngbawl kalpui tan a nih dawn tak avangin khawtlang hruaitute an pawimawh takzet dawn tih sawiin, he hmalakna hi mipui mimir tel lovin a hlawhtling thei lo tih hriain an thil zir leh sawiho te chu mahni khua theuhah hawn a, an khaw mipuite thinlung hneh tum theuh turin a chah a. Solid Management hi thianghlimna leh faina laimu a nih thu sawiin, an bawlhhlawh te bawlhhlawh paihna hmuna chhungkhawm ngawt tawh lovin, tunlai Science thiamna hmangin mihring leh environment tana tha turin, tih riral a ni tawh dawn a. He hmalakna hlawhtlinna tura thawhhopuiah kalkhawm te a sawm a ni.

Bawrhsap chuan Bawlhhlawh tihtlem kawnga tan la tura Serchhip District mipuite chu ngenin, “Kan bawlhhlawh tam tak hi thil tangkai dang siam nana hman nawn theih a ni thin a; chuvangin, a theih chin chinah bawlhhlawh neih tlem (reduce), hman nawn (reuse) leh thildang siam nana hman tangkai (recycle) i tum ang u,” tiin a fuih bawk.

PHE Department leh Green Herd SP te thawhhonain Serchhip District chhunga thingtlang khua zawng zawngah bawlhhlawh thliarhran a nih dawn bakah Green Herd SP te hian bawlhhlawh an khawn tawh dawn a. Bawlhhlawh phur motor tlan dan tur pawh ruahman nghal niin thingtlang khaw tin te hi chawlhkar khat-ah ni khat zel tlawhin bawlhhlawh hi khawn a ni ang.

Nimin-a he hun hman hi Addl DC, Lalrinzuala chuan kaihruaiin Er. Lalropuia Hmar, Director PMU, PHED Mizoram chuan Solid Waste Management chungchang a sawifiah bakah PMU Consultant, Green Herd SP leh PHE Department Serchhip aiawh ten thu an sawi bawk a. He hunah hian khaw hrang hranga bawlhhlawh sawngbawl dan tur inhrilhhriatna (Awareness campaign) neih dan tur te, bawlhhlawh dahkhawmna hmun tur leh khawn dan tur te, bawlhhlawh sawngbawlna man chungchang te sawiho a ni a. Awareness campaign hi khawtin ah neih tha tih niin VC lamin Gram Sabha koin a tul angin PHE Department lam ten an telpui anga; Sanitation fee thla tin Rs. 50 lak nise; Sanitation point hi Green Herd SP leh VC ten ruahmanna an lo siam ang chu rin phawt ni se, a tul angin siamthat ngai siamthat leh nise tiin ruahmanna siam a ni.