Chief Minister’s Special Package kalpui mek zel

Mizoram Hand Holding Scheme (Bana Kaih) peng pakhat Chief Minister’s Special Package hnuaia tanpuina semchhuak turin hmalak mek a ni.

Siaha District-ah chuan Chief Minister’s Special Package hnuaia Progress Partner-te tan hian nimin khan DRDO Conference Hall-ah Orientation Training neih a ni a, Siaha District atanga Chief Minister’s Special Package dawng te hi an vaiin mi 35 an ni a, Agriculture, AH&Vety, Commerce & Industries Dept, Horticulture, Tourism leh I&PR Department hnuaia Trade hrang hrang thlangte an ni a. He hun hmanpuitu Siaha Bawrhsap VL. Hruaizela Khiangte chuan Siaha District in Progress Partner 35 chauh a nei chu pawi a tih thu sawiin, mipui vantlang hamthatna tura Sawrkar in scheme a duanchhuahte hmang tangkai turin bengvar chhuah thin a pawimawh takzet tih a sawi bawk.

Lawngtlai-ah pawh nimin khan DC Conference Hall-ah Bana Kaih Scheme hnuaia Chief Minister's Special Package atana thawhpui turte (Progress Partners) tan Orientation Training buatsaih a ni a, Lawngtlai District-ah hian Department 6 nena thawkho turin Progress Partners mi 81 thlanchhuah an ni a. Nimin-a Training hi Lawngtlai DC Cheemala Siva Gopal Reddy IAS chuan hmanpuiin Sawrkarin mi taima leh rinawm, hlawhtlinna chang ngei tura thawk tura a beisei thlanchhuah an nihna hriaa theihtawp chhuah turin a chah bawk.

Champhai-ah pawh nimin khan District Monitoring Committee for Bana Kaih Scheme chu thukhawmin Chief Minister's Special Package hnuaia thawhpui tura thlan Progress Partner te thawhpui dan tur an sawiho a. CM Special Package hnuaiah hian Champhai District atangin mi 96 Progress Partner atan thlanchhuah an ni a, Agriculture Department-ah 9, AH&Vety. Department-ah 26, Commerce & Industry Department-ah 28, Fisheries Department-ah 28, Land Revenue Department-ah 2, Sericulture Department-ah 2 leh UD&PA-ah 1 te niin naktuk-ah Orientation Training an nei ve dawn bawk a ni.