Ramri buaina a inbiakna turah Assam ngaichang

Ramri buai chungchanga inremna siam tura Mizoram leh Assam Official-te inbiak lehna hun tur ruahman kawngah Assam Official-te thu ngaihchan mek a ni.

Inrinni kalta, July ni 26 kha kum 2021-a Vairengte dai-a Mizoram leh Assam Police te ramri buai kaihhnawiha an inkah champha vawi 4-na a ni a. Kha tah khan Assam Police 6 in vanduaithlak takin nunna an chan a ni. Hetihlai hian State pahnih Secretary kaihhruai Palaite inbiak lehna hun tur chu Assam lam hian an la rawn tichiang rih lova, a hmun tur erawh chu Mizoram ni turin ruahmanna siamsa a ni a, Secretary kaihhruai State pahnih palaite hi an inbe leh a nih chuan awmze nei taka an inbiak vawi hnihna tur a ni dawn a ni. Kumin April ni 25 a Guwahati-a an inbiakna hmasa zawkah khan inbiak vawi hnihna chu Mizoram in thleng se, hun remchang hmasa berah inbiak leh nise tiin thu an dah a. 

Mizoram lamin Mizoram leh Assam ramri atana a pawm, kum 1875 hriattirna chhuah kaihhnawiha Assam hnena February ni 13, 2023 leh November ni 28, 2023 a thawnte chu uluk tak leh chipchiar takin Guwahati inbiakna-ah khan sawiho a ni a. Bengal Eastern Frontier Regulations, 1873 tlawhchhana kum 1875-a hriattirna chhuahin a huam chin ram chungchang leh khaw hrang hrang awmdan Mizoram-in Assam hnena a a thehluh tawhte sawiho a ni bawk a. Assam lam hian November ni 28, 2023 a Mizoram lehkha thehluh a chhanna hi mumal takin a hmalamin thehlut se, chumi hnu-ah Official Level inbiakna-ah sawiho leh nise ti a remtih tlan a ni. Chutih lai chuan Mizoram lamin November ni 28, 2023-a ram hauh chin khaw 62 chungchang hi a la rawn chhang let rih lo bawk niin Home Department hotute chuan Akashvani Aizawl an hrilh a ni.

Mizoram leh Assam inkar ramri hi North-Eastern Areas Reorganisation Act, 1971-ah khan ziahlan a ni chungin State pahnih ramri km 123 a thui hi a tak tak a hmuna rin a awm lova, chu chu ramri buai lo intanna bul ber chu a ni.