Serchhip District-a raltlan awm te tan Biometric Enrolment kalpui tan tum a ni

Sawrkar laipui in ruahmanna anga Mizoram-a Myanmar leh Bangladesh atanga raltlan awmte Biometric Enrolment kalpui hna chu Serchhip District-ah pawh Vawiin hian kalpui tan tura ruahman a ni a, chhinchhiahna hnuhnung berah Serchhip District-ah hian Myanmar atanga mi 647 leh Bangladesh atanga raltlan 266 an awm a ni.

Mizoram-a Myanmar leh Bangladesh atanga raltlan awm mek te mit naute leh kutze thlalak hna thawh tura ruahmanna chu peihfel thawkhat a ni ta a, he Biometric Enrolment hi tun thla, July 2025 chhunga tan hman tum a nih angin Serchhip District-ah pawh Vawiin hian a hmasa ber atan Serchhip Chanmari VC huamchhungah kalpui tan tura ruahman a ni a, hemi hnu hian VC Area hrang hrangah kalpui chhunzawm tura ruahman a ni bawk. Serchhip District-a Biometric Enrolment kalpui tur atan hian thawktu turte pawh training pek ni tawhin hmanraw pawimawh te pawh a rawn thleng tawh a, Raltante hi an awmna hmunah kal chilhin an Biometric Data lak tur a ni a, he hna thawktu tur, District User atan mi 6 ruatchhuah niin heng mite hian Serchhip District chhunga Myanmar atanga raltlan rawn lut te hi Foreign Identification Portal-a chhinchhiah turin hmel leh kutzia (fingerprint) te an lak sak dawn a. Enrollment tihna hmunhma chu an khaw hruaitute (VC leh YMA) ten an lo ruahman dawn a ni.

Chhinchhiahna hnuhnung ber, kumin May ni 21-a chhinchhiahna atanga a lan danin Serchhip District-a khaw 30-ah Myanmar atanga raltlan rawn lut hi an awm a, raltlan rawn lut te tan hian Serchhip District-ah hian Relief Camp siam awm lovin raltlan awm te hi chhung leh khat te bel leh In luah-a khawsa ta an ni a. kum 18 chunglam mipa 198 leh hmeichhia 150 awmin kum 18 hnuailam mi 299 an awm bawk a, Myanmar atanga raltlan rawn lut hi an vaiin mi 647 an ni. Heng bakah hian Serchhip District-ah Bangladesh atanga raltlan rawn lut pawh Thenzawl-ah mi 266 awm bawkin heng te hi mipa 75 leh hmeichhia 73 bakah kum 18 hnuailam mi 118 te an ni a. Serchhip DC Office-a thawktute chuan raltlan awm zat hi a danglam ve reng tih sawiin, tuna raltlan awm zat dik tak pawh hi Biometric Enrolment tihfel hnuah a chiang thei chauh dawn niin an sawi.

Mizoram-a Biometric Enrolment kalpui turah hian District tina Bawrhsap te kaihhruai District Level Committee on Displaced Persons chu mawhphurtu a ni dawn a. He Committee hnuaiah hian a taka hna kalpuitu tur Biometric Enrollment of Displaced Persons ti a vuahin Nodal Officer ruat zel a ni a. Nodal Officer kaihhruaina hnuaiah hian Bawrhsap Pisa leh District SP Pisa a thawk thlan bikte bakah raltlan awmna khaw tina VC leh YMA hruaitute chu mawhphur tura ruat niin Team hrang hrang insiamin Biometric Enrolment hi kalpui a ni ang.