Kargil Vijay Diwas hmangin sipaite zahna hlan an ni

Kum 1999-a Kargil indonaa-a India sipai thite hriatrengna hun, Kargil Vijay Diwas chu Inrinni khan ramchhung hmun hrang hrangah urhsun taka hman a ni.

Kargil Vijay Diwas-ah hian President Droupadi Murmu-i chuan Kargil indonaa sipai thite zahna hlanin, sipaite huaisenna, inpekna leh inhlanna te chu Kargil Diwas hian a hriat thar tir tih sawiin, Ram tana an inpumpekna chuan ram-chhung mipuite thinlung a hneh em em a ni, a ti. Defence Minister Rajnath Singh pawhin New Delhi-a War Memorial-ah sipaite pualin pangpar a dah a. He hunah hian Dfence Secretary Rajesh Kumar Singh, Chief of Defence Staff General Anil Chauhan, Chief of Air Staff Air Chief Marshal AP Singh leh Chief of Naval Staff Admiral Dinesh K Tripathi te pawhin pangpar an dah a ni.

BJP Mizoram pawhin Inrinni khan ‘Kargil Vijay Diwas’ pualin Aizawl-a BJP Mizo-ram State Office-ah hun an hmang bawk a, he hunah hian Palak Bialtu MLA K. Hrahmo chuan he ni hi India ram tana ni pawimawh leh ni chhin-chhiah tlak tak a ni tih sawiin, “Kum 1999-a Kargil War-a India-in hnehna a chan hriatrengna leh chu Indona-a Sipai huaisen nunna chan ta te hriatreng nana hun hmanthin a ni,” a ti a. “Kargil War-ah hian India sipai huaisente chu khawluma piang leh seilian nimahsela, an tawrhchhelna leh an tumruhna leh an huaisenna avangin India chuan hnehna a chang thei a ni. He Kargil War hian India ram chu khawvel hriatah a ropui  zia a tarlang a ni. India hmalakna fing tak avang khan khawvel pawhin India an hmuh dan a dang ta a ni. Vawiin-a he laia lo kalkhawmte pawh hian kan Sipai huaisente kan hriat reng a, India ram venghimtu kan Sipaite zahna kawngah pawh kan anharh a, kan zah an pawimawh hle a ni,” a ti.

Hemi hnu hian Sipai huaisen, Ram tana nunchante hriatrengna leh zahna entirnan Zodin Square-a War Memorial-ah Pangpar an dah a ni.