Lokayukta in Investigation Wing a la nei lo

Kum 2019-a din eiruk thubuai chhuitu tur, Mizoram Lokayukta chuan kumin thlengin thubuai chhuitu tur, ‘Investigation Wing’ a la nei lo a, hetihlai hian thubuai chhui tur 78 a dawng tawh.

Mizoram Lokayukta tarlan danin, March, 2019-a din a nih atanga kumin thlengin an hnuaiah thubuai 78 ziahluh a ni tawh a, chung zinga 55 chu chhui zui tlaka ngaih a ni a. Case hearing tum 45 neih ni tawhin thiamloh chantir pali leh thiam chantir pakhat an awm tawh a, Department proceeding tura tih thubuai pathum a awm tawh bawk.

Mizoram Lokayukta hotute sawi danin tun thlengin thubuai chhuitu tur, Investigation Wing a la nei lo a, Enquiry Wing erawh a nei tawh a. Investigation Wing a la neih loh avang hian thubuai chhui tur an dawnte chu Anti Corruption Bureau (ACB)-ah an pek zel a ngai thin a ni. Investigation Wing nei tur hian Mizoram Lokayukta Rules tihdanglam a ngai dawn tih thudawnna chuan sawi bawkin, hei hi sawrkar khawih tur a nih thu a sawi.

Mizoram Lokayukta-a eiruk thubuai thehluh hi lehkha pheka ziakin Mizoram Lokayukta Office-ah pisa kai chhungin thehluh theih a nih bakah email hmangin mizoramlokayukta@gmail.com-ah emaw, mizoram.lokayukta@gov.in-ah thehluh theih a ni a. Tunhnaiah hming awm lo leh thubuai thehluttute biakpawh theih loh complaint a awm thin a, thu zawh belh ngai leh complaint kal zel dan tur hriattir turin complaint kalpui chhunzawm zel a harsa thin tih sawiin, Complaint-ah hian thubuai thehluttuin a hming leh biakpawh theihna chiang takin a ziak thin tur a ni a. Thubuai thehluttuin a hming leh nihna thup a duh a nih pawhin a hming leh nihna thupsak tlat tur a ni tih an sawi bawk.