Mizoram-ah ASF hri a hluar zel, Chhim lamah a nasa

Mizoram-ah Vawk pul hri, African Swine Fever (ASF) chu a la leng zel a, kumin hian Mizoram chhimlam District pahnih, Siaha leh Lawngtlai District te chuan an tuar nasa hle a, ASF vanga Vawk thi leh suat tam tak awm tawhin, Vawk vulhtute leh sawrkar tan harsatna lian tak a thlen mek a ni.

Siaha District-ah hian ni 110 chhungin ASF vang hian Vawk 4,126 a thi tawh nia chhinchhiah a ni a, heng zinga 3,191 chu hri vanga thi niin a dang 935 te chu hri leng darh zel tur venna atana suat a ni a. Heng Vawkte hi Siaha District-a khaw 25-a chhungkaw 1,215-te vulhlai a ni. Kumin April ni 6-a Vawk thi hmasa ber report a nih hnuah hri hian kiam lam pan tawh mah se tun thlengin vawk thi a la awm reng a ni.

Lawngtlai District chu Mizoram District zinga ASF tuar nasa ber dawttu a ni mek bawk a, kumin chhungin an District-ah hian Vawk 2,151 a thi tawh a, heng zinga 1,757 chu ASF vanga thi niin a dang vawk 394 chu tihhlum (suat) a ni thung a. Lawngtlai District chhungah khua leh veng 18-a chhungkaw 380-te chu he hri leng hian a nghawng buai a ni. ASF darh zel tur vennan sawrkarin khapna thupek a chhuah chungin Lawngtlai-ah chuan District pawn atanga vawk lakluh ruk a la awm tih hriat a ni a, Zirtawpni khan thupek bawhchhia phalna nei lova vawk talh mi pahnih man niin an chungah dan anga hremna lek a ni dawn a ni.

AH&Vety Department in an chhinchhiah danin kumin chhung hian July 25 thlengin Mizoram District 6-ah ASF avanga Vawk thi leh suat hi a awm tawh a, Vawk hri leng mek hi khaw 100-a chhungkaw 2369 ten tuarin Vawk thi 6296 leh Vawk suat 2362 a awm tawh bawk a. Heng District pahnih te bakah hian Khawzawl District-ah Vawk thi 735 leh suat 64 a awm tawh a. Lunglei District-ah Vawk thi 390 leh suat 878 awm tawhin Mamit District-ah Vawk thi 205 leh suat 65 a awm tawh bawk a. Champhai District-ah Vawk thi 18 awm ve leh tawh bawkin Vawk 6 suat a ni tawh bawk a ni.