Chibil pawl din lo turin hriattir

Champhai Sub-Hqrs. YMA chuan an District huamchhunga Myanmar raltlan awmte chu chibil pawl din lo turin a hriattir.

Tunhnaia Champhai Sub-Hqrs. YMA-in Champhai District chhunga Myanmar raltlan awmte tana inkaihhruaina a tih-chhuahah chibil pawl din a khap a. Raltlan, sawrkar leh khawtlang duh loh thil (ruihhlo leh thil dang) lakah an inhnamhnawih tur a ni lova, chutianga inhnamhnawih man an nih chuan Jail-a dah an nih pawhin hremna an tawrh zawh hnuah Myanmar ramah thawn haw an nih tur thu an tarlang a. Ruihhlo hmanga sumdawnnaa inhnamhnawih, roreltute hnen thleng kher lo pawh anmahni khaw lamah thawnhaw an ni ang a, chutiang mite chu an thlalak leh an hming Social Media-ah puanzar bawk tur a nih thu an tarlang bawk. 

Champhai Sub-Hqrs. YMA chuan raltlan reng reng an awmna YMA Branch-ah an inziaklut vek tur a nih thu leh hemi rual hian raltlan te reng rengin Myanmar sawrkarin a siamsak Identity Card an kawl chu an awmna YMA Branch-ah an an thehlut vek tur a ni, an ti bawk a. Raltlante chuan Ram Dan leh vengchhung Dan an zawm tur a ni a, an zawm lo a nih chuan an chungah eng ang rorelna pawh thleng se an sawibuai thei lovang a, an awmhmun an sawn duh a nih chuan an awmna hmasa YMA Branch an hriattir anga. Branch hruaitu ten an insawnna tur Branch-ah ziakin an hriattir tur a ni. Branch tin in raltlante chhinchhiahna inang tlang neih tur a ni a, thla 3 danah mahni huamchhunga raltlan neih zat report thin tur a ni.

Hei bakah hian Sub-Hqrs. YMA, Cham-phai huamchhungah sawrkar atanga phalna lak ngai chi sumdawnna reng reng raltlan ten an kalpui tur a ni lova, anmahni pualin lirthei hmanga sum-dawnna an kalpui tur a ni lo a. In hmun lo ram an neih phal a ni lova, lo nei an awm hriat a nih pawhin an neih lohna tura hmalak a nih tur thu an tarlang bawk a ni.