Meteorological Centre Aizawl hmalakna leh hmachhawp te Larsap sawipui

India Meteorological Department (IMD) hnuaia Meteorological Centre Aizawl-a Director & Head Sudheer Kumar Dwivedi chuan nimin khan Larsap hmuin an hmalakna leh hmachhawp hrang hrangte a sawipui.

He inkawmna ah hian Sudheer Kumar Dwivedi chuan Meteorological Centre Aizawl tihchangtlung kawnga Larsap hmalakna leh thlawpna an dawn thin avanga lawmthu sawiin, an hmalakna leh hmachhawpte a lem nena entirin a sawifiah a. Meteorological Centre Aizawl hmalakna hrang hrang tarlan zingah hian VVIP lo zin apianga an kalna tur hmuna khaw awmdan tur hrilhlawkna siam bakah ni 7 chhung atan zela Mizorama khaw awmdan tur hrilhlawkna siamte, Tourist hip nana Aizawl Air Quality Index siam bakah Mizorama khualzinte kal tamna hmun 4 thlanchhuaha khaw awmdan tur hrilhlawkna (Tourist Places Forecast) siamte leh darkar 6 kalta khaw awmdan kimchang, Social Media leh Website kaltlanga tarlante a tel a ni.

Larsap General (Dr) Vijay Kumar Singh (Retd) chuan Meteorological Centre Aizawl-in July ni 27, 2025-a kum hnihna hmel a hmu mai tur chu lawmawm a tih thu sawiin, Director & Head Sudheer Kumar Dwivedi leh a thawhpuite duhsakna a hlan a. Khaw awmdan tur hrilhlawkna leh data pawimawh tak tak siam kawnga an hmalaknate fakawm a tih thu sawiin, an hmalaknate tun aia zau zawka tihlar-a put darh zung zung a nih theih nan line department leh media-te zau zawka thawhpui tur leh Mizo mipuite'n tangkai taka an chhawr theih nan Mizo tawng ngeia tarlan tum turin a chah a. Mizoram-a Radar bun thuai a nih theih nana hma la rang turin a chah nghal bawk.

He hunah hianMeteorological Centre Aizawl-a Director & Head Sudheer Kumar Dwivedi chuan hmachhawp an neih a tarlan zingah kumin chhung ngeia Mission Mausam hnuaia Doppler Weather Radar, Laipuitlang, Aizawl-a bunte, Mizoram-a Cyclone tleh thin zinga za zela 90 te chu chhim lam atanga lo thawk a nih avangin Siaha-ah Meteorological Office bunte leh zirlaite tan Aizawl Meteorological Centre-a Training & Awareness Centre dinte a tel a. Heng bakah hian nakin zel atana lo inruahman lawk nan Aerodrome Meteorological Station (ASM), Lengpui chu tun aia changtlung zawk Aerodrome Meteorological Office (AMO) a hlankai an tum a ni.