High Level Task Force thutkhawm ah CM a tel

Ministry of DoNER hnuaia Nagaland Chief Minister Neiphiu Rio kaihhruaina hnuaia din High Level Task Force on Handloom & Handicraft chu nimin khan thukhawmin Chief Minister Lalduhoma pawhin a Pisa atangin Online hmangin a lo zawm a ni.

He thutkhawm ah hian Chief Minister Lalduhoma chuan India rama handloom lama hnathawk thei mihring zaa sawmruk te hi hmarchhak-a awm an nih thu sawiin, “Hei hian Handloom lama hma kan sawn zel theihzia a tichiang hle. Chuvang chuan a taka chantir theih hmalakna tur (road map) duang ila, Common Facility Centre nei thluah ila, kan puantahtute (Artisan) training pe ila, State leh State te inthlunzawmna (Inter State network) te siam ila, hmarchhak product hi quality standard pakhat hmangin branding kalpui ila, Skill & design lamah thil thar (innovation) neih tumin uar ila, khawvel hriat khawpa Textile Hub langsar takah kan insiam theiin ka ring,” tiin a rawtna a sawi a ni.

He hunah hian DoNER Minister Jyotiraditya Scindia leh Union Minister of Textiles Giriraj Singh bakah hmarchhak state Chief Minister leh an aiawh ten thu an sawi a. Ministry of DoNER hian India hmarchhak Bial-in hmasawnna kawng dik a zawh theih nan High Level Task Force pariat (8) a din a, State bil anga hmasawnna ruahman ringawt lova hmarchhiak Bial pumpui tana tangkai tur, State hrang hrang te huapzo duanchhuah tumin an thukhawm thin a. Thla thum chhungin Task Force Report peih hman an tum ang. He thutkhawm ah hian Chief Minister hi Chief Secretary Khilli Ram Meena, Commissioner & Secretary to CM Vanlaldina Fanai leh Commissioner & Secretary, Commerce & Industries Dr. Lalzirmawia Chhangte bakah Planning Department-a Official ten an tawiawm a ni.