Hindi zir chungchang ah inrawnkhawmna nei

Mizoram Education Reforms Committee chuan nimin khan Hindi zir chungchanga inrawnkhawmna an buatsaih a, he hunah hian Hindi zirna lama thawktute leh mithiamten Hindi zirna tihhmasawnna tur kawng hrang hrang an sawiho a ni.

School Education Directorate Conference Hall-a inrawnkhawmna ah hian School Education Director Angela Zothanpuii chuan Hindi pawimawhna sawiin, “Mizoram pawnah Hindi pawimawhna a lo lang chiang thin a, School tha tak takah pawh Mizo naupangte an kal hian an buai thin, puitling pawh Hindi thiam lo chu hnamdang zingah kan buai thin,” a ti a. “Kan Hindi zir dan hi insiamthat tulna a tam hle a, he inrawnkhawmna hi a pawimawh hle a ni,” a ti bawk.

He hunah hian School Education Department-a Consultant Rev. Dr. K.Thanzauva chuan ‘Engtin nge Mizo Zirlaite hi Hindi-a tha taka kan tawng tir theih ang?’ tih chu he hun an buatsaih chhan a nih thu a sawi a. “India rama awm kan nih avangin Hindi hi Official Language a ni si a, kan thiam ngei a tul bawk si, engtinnge Mizo Zirlaite kan zirtir ang tih hi ngaihtuah a ngai ta a ni,” a ti a. Hindi zirtirnaa Mizoram dinhmun tarlangin, “Hindi Teacher 1393 kan nei a, heng zingah hian regular 538, contract 855 an ni a. High School-ah 440 an thawk a, Middle School-ah 953 an awm,” tiin Mizo Zirlaite hian Hindi hi an zir nep ep avangin an thiam tak tak lo nia a hriat thu a sawi bawk.

Mizoram Education Reforms Committee-a Working Chairman Prof Lalbiakdiki Hnamte chuan kan Hindi zirtir danin a thlen chin leh duhthusam lohna laite sawiin, tun dinhmunah ziak leh chhiar te thiam mah ila a awmzia kan hriat loh dan te, mi zingah kan tawng thiam loh dan te a sawi a, tuna kan zir dan chu a taka hmanna turah awmzia a nei tawk lova a hriat thu leh hmasawn tura tanlak a ngaih thu a sawi bawk. He hunah hian zirna In a thawk leh School Education Department-a thawk te bakah zirlai pawl hruaitute an tel a ni.