Kawnpui leh Sairang inkar kawng chhia ah eptu party ten sawrkar an sawisel

MNF Party chuan kawngpui siamna tur pawisa awm reng chunga kawng siam that a ni lo chu pawi an tih thu sawiin, Mizoram sawrkar in mipui te a zah lo nia an ngaih thu an sawi.

Inrinni-a Aizawl Press Club-a thuthar thehdarhtute an kawmna ah MNF General Secretary J. Malsawmzuala Vanchhawng chuan ZPM sawrkarin kawng siam nana chhiah a lak, Road Maintenance Cess tlingkhawm pawh cheng vbc. 25 chuang a tling tawh tih sawiin, kawngpui siamna tur pawisa awm reng chunga kawng siam that a ni lo chu pawi an tih thu leh Mizoram sawrkar in mipuite a zah lo ni ah an ngaih thu a sawi a. Tuna kawng chhe zual em em, motor tam tak a tan vanga mipuiin harsatna namen lo an tawhna chhan lian ber Kawnpui - New Khamrang kawng chu nikum lamah pawh mipuiten nasa taka an tawrh chhan a lo ni tawh tih sawiin, “Kum 2024 September thla ah sawrkarin Contractor bantirin, a security pawh cheng nuai 35.37 lai a chhuhsak a, hemi hnu hian engmah ti mumal lovin Sawrkar-in a thlir a, a mutthluk san chhunzawm leh avangin kumin ah harsatna namen lo tawh a ni ta a ni,” a ti.

Kumin July ni 7-a NHIDCL-in an lak fel tak hma zawng kha chuan State sawrkar mawhphurhna a ni tih chu thudik a nih thu pawh sawiin, mawhphurtu dang kawh tur dap phei chu mawhphurhna lak ngam lohna leh a tuartu Zoram mipui zahlohna nasa tak niin a sawi a, “Contractor security chhuhsak kha kawng siamna tur liau liaua mipui chhiah pekkhawm leh State sum pawha belhchhahin, Thal chhung khan lo siam chu nise heti em em hian mipui kan buaiin kan tuar lo ang,” a ti bawk.

Hetilai hian MPCC General Secretary PC. Laltlansanga chuan kar kaltaa Congress Bhavan-a MPCC Political Session an neih ah Kawnpui leh Sairang inkar kawng NH-06 chu nikum (2024) Fûr-ah pawh khan a chhe em em tawh tih sawiin, motor tam tak an tluk thin thu a sawi a. “Mizoram Comercial Vehicle neitute leh Driver ten nawrh an huaihawt a nih kha. Khami tum khan kan CM chuan Dt. 16th September, 2024 khan nawrh huaihawttu MCVU te kawmin an hnenah, 'Hna kan tan nghal dawn a. Satguru te Security Deposit pawh kan laksak tawh' tiin a lo hrilh a nih kha. Kum 2024 September atangin NH 06, Kawnpui to New Khamrang inkar hi Mizoram sawrkar PWD kutah a awm a. NHDCIL hian Mizoram sawrkar kut atangin kumin July ni 7 atang khan an la chhawng chauh a ni a, Thal khaw tha, thla 9 chhung PWD kutah a awm. Chuvangin helai kawng chhiat avanga harsatna kan tawh mekte hi sawrkar mawh liau liau a ni,” tiin ZPM chu mipui in an ning tan der tawh niin a sawi bawk.