PMEGP Loan hmang tha lo an tam niin sawi

Mizoram KVI Board Chairman C. Lalremliana chuan kum 2024-2025 Financial Year chhunga Mizoram KVI Board kaltlanga Prime Minister's Employment Generation Programe (PMEGP) Bank loan la te hmalakna chu a hmunah tlawhin a enfiah.

MKVI Board Chairman chuan Champhai-ah PMEGP loan la mi 15 leh Khawzawl District-ah 5 bakah Aizawl-ah mi 9 a tlawhchhuah tawh thu sawiin, “He programe in a tum ber, thalai te eizawnna bul tanna tur a nih anga tha taka hma lo la an awm a, an loan lak hmang tangkai tak leh midang te eizawnna lo siam sak te pawh an awm a ni. Hetihlai hian bul tanna pakhat pawh hmuh tur la awm lo, thenkhat phei chu an address zawh dawn pawha Phone tlang theih loh te an awm a ni,” tiin a tam zawkin hma an la tha lo chu pawi a tih thu a sawi a. “A tul dan ang zelin Mizoram KVI Board in portal-a kan thun PMEGP loan la te kan enzui zel dawn a ni,” a ti bawk.

MKVI Board Chairman chuan PMEGP Loan hi Rural area-ah Margin Money chu 35% leh Urban area-ah 25% a nih thu sawiin, “State hian Quata kan nei a, hmunpui lam atangin kum 5 chhung atan allocation min rawn siam sak thin a, mi thenkhat hmelhriat nei tha ten project siamin PMEGP Loan pek san theih ber nuai 50 thlengin Loan an la a, Margin Money chauh an la a, hmalakna awm leh si lo te hian eizawnna bul tan duh tak tak te kawng an dang ping a ni,” a ti bawk.