Mizoram-a Oil phurhluh a khaihlak leh dawn niin a lang

Mizoram chak lakluhna kawngpui ber a chhiat avangin Northeast Petroleum Mazdoor Union chuan naktuk, August 1, 2025 atangin Mizorama Oil phurhluh an chawlhsan rih dawn.

Northeast Petroleum Mazdoor Union General Secretary Ramen Das-a’n IOC Chief General Manager hnena lehkha a thawnah he thu hi a tarlang a, Mizoram Oil Tanker Driver Association te chuan July ni 19-a Mizoram kawng a chhiat nasat avanga nawrh an huaihawt hnuah pawh Mizoram kawng chuan ziaawm lam a pan theih loh avangin Mizoram kawngin ziaawm lam a pan hma chu August ni 1, 2025 atangin tlan tawh loh nise an ti tih a sawi a ni.

Mizoram Oil Tanker Driver's Association chuan phai lam atanga tuialhthei an lakna ten load an pek loh chuan oil phurh tur an nei theih tawh dawn bik lo tih an sawi a, Mizoram Oil Tanker Driver's Association President Romel Lalruatdika chuan kawngchhiat hnua lirthei tlan tan theih, kar kalta Zirtawpni tlai atang khan Mizoram-a Oil phur tura Oil pechhuaktu Company ten challan an pekchhuah tam loh avangin Mizoram mipuite tuialhthei mamawh a phuhru pha lotih a sawi a. Thudawn danin, Indian Oil Corporation Ltd. (IOCL) phur lirthei challan 170 siam a ni tawh a, Bharat Petroleum Corporation Ltd (BPCL) leh Hindustan Petroleum Corporation Limited (HPCL) motor 30 a awm tawh bawk a, nimin bikah IOCL lirthei 17, BPCL leh HPCL motor 8 hnenah challan pek a ni tawh a ni.

Hetihlai hian Mizoram Merchant Association General Hqrs. chuan Mizoram chak lakna kawngpui a chhiat avang hian harsatna namenlo an tawk a, an mangang takzet tih thuchhuah siamin an sawi a, Sumdawngte bungrua hrang hrang thla 2/1 kawng lakah tangkhangte pawh a awm tawh a, thenkhatte bungrua phei chu a chhia a, a then chu Guwahati Transporters Godown lamah phurhlet a ni bawk tih sawiin. Iron and Cement a thlen theih loh avangin, In sa laklawhte an chawl a. Motor kalman nasa taka a san thu an sawi a. Hetihlai hian sumdawng ten GST pek a ngaia, Dawr luahman leh an mi chhawrte leh an chhungkaw ei leh in ngaihtuah a ngaih avangin kawng hi a chak thei ang bera siam turin Mizoram Sawrkar leh NHIDCL te an ngen tih an sawi a ni. 

ZPM Party chuan nimin khan thuchhuah siamin Aizawl - Silchar kawng chhe lai thawmthat hna thawh mek hi nimin khan Deputy Speaker Lalfamkima, MLA TBC Lalvenchhunga leh Lt. Col. Clement Lalhmingthanga ten a hmunah an tlawh a. Police duty te dah niin PWD Highway CE leh SE leh Official dang te pawhin a hmun ah riahchilhin siamthat hna an thawk mek zel tih an sawi a. Mizoram buangraw mamawh phur hrang hrang nitin za tel chhuah a nih thu leh nimin-ah tuialhthei leh eirawngbawlna gas phur lirthei telin lirthei 122 Aizawl lam pantir an nih thu an sawi bawk.