Serchhip District atanga CM Special Package dawng tur ten Training an nei tan

The Mizoram Bana Kaih (Handholding) Scheme hnuaia Serchhip District chhunga CM Special Package dawng turte tana ni hnih (2) chhung awh tur Training chu nimin khan Serchhip Bawrhsap Pisapui Hall-ah neih tan a ni a, he ruahmanna hnuaiah hian Serchhip District-ah tanpuina dawng tur mi 392 zet an awm a ni.

Mizoram sawrkar Flagship Programme, The Mizoram Bana Kaih (Handholding) Scheme hnuaia Serchhip District chhunga CM Special Package dawng turte tana Training hi nimin khan Serchhip Bawrhsap Paul L. Khuma chuan hawngin Mizoram sum leh pai, ei leh bar dinhmun siamthatna turin sawrkar in an Ban-ah kaiin hmasawnna atana thawhpuiah CM Special Package dawngtu tur progress partner a thlang chhuak tih a sawi a; he Scheme hlawhtlinna tur mawhphurhna sang tak chu a dawngtute ko-ah a innghat tih sawiin, tanpuina dawngtuten leirem an rah theihna tur nia an beisei, hmalakna tur an chhawpchhuah te sawrkarin a ring tawk a, a pawmpui a; sum leh pai an dawn turte chu dik tak leh rinawm taka hmang turin a chah a a. Deparment tin ten an hnuaia tanpuina dawngtute uluk takin an vil zui dawn a, hemi piah lamah hian a dawngtuten an sum dawnte a thlawna luanral tir lova hmasawnna rahbi thar an kai ngei theihna tura tangkai taka hmang turin a fuih a ni.

Serchhip District chhungah hian Line Department hrang hrang hnuaiah CM Special Package atanga tanpuina dawng tur hi chhungkaw 392 zet an awm a, heng te hi Agriculture Department hnuaiah mi 14, AH&Vety Department hnuaiah mi 127, Commerce and Industries Department hnuaiah mi 140, Fisheries Department hnuaiah mi 36, Horticulture Department hnuaiah mi 58, Land Resources, Soil & Water Conservation Department hnuaiah mi 10, Sericulture Department hnuaiah mi 6 leh I&PR Department hnuaiah mi pakhat te an ni a. Nimin-a Training-ah hian Agriculture, Fisheries, Sericulture, AH&Vety leh LRS&WC Department kaltlanga CM Special Package dawngtu mi 197 te an tel a, Vawiin hian Commerce and Industries, Horticulture leh I&PR Department hnuaia tanpuina dawngtute an training ve thung dawn a ni.

Nimin-a training hi Serchhip Addl. DC Lalrinzuala chuan kaihruaiin Handholding Scheme nihphung leh sumdawnna chungchang ah SDC Dr. C. Vanlalchhanhimi chuan zirtirna a pe a, Accounts Officer Anne Lalhriatpuii’n sum leh pai vawn dan a zirtir bakah Bank Loan chungchang chu MRB Serchhip Branch Manager Lalnunsangi hnen atangin ngaihthlak a ni bawk a. Hei bakah hian Solar Electric Light Company (SELCO) aiawhten kalkhawmte an zirtir bawk a. He Training a tel te hnenah hian Certificate sem a ni bawk.