Serchhip District-a raltlan awm te tan Biometric Enrolment kalpui tan a ni

India rampawn atanga Mizoram-a raltlan rawn lut te Hme, pianphugn leh an kutzia laa chhinchhiahna, Biometric Enrolment chu nimin khan Serchhip District-ah kalpui tan a ni ta a, nimin khan a hmasa ber atan Serchhip Chanmari VC Area-a raltlan mi 16 te chu Biometric Enrolment tih sak an ni.

Sawrkar laipui ruahmanna anga Mizoram-a raltlan rawn lut te chhinchhiahna tura Biometric Enrolment hi nimin khan Serchhip District-ah kalpui tan a ni a, a hmasa ber atan Serchhip Chanmari VC huamchhungah Biometric Enrolment hi tih niin Serchhip Chanmari VC Hall-ah sawrkar in he hna thawk tura a ruat te chu kalin raltlan te chhinchhiah hna hi an thawk a, sawrkar in Data a neih mekah an huamchhungah hian raltlan mi 9 awm angin tarlan ni mah se mi 16 te chu Biometric Enrolment tih sak an ni a, he hunah hian Serchhip DC Office atangin Nodal Officer SDC Vanthangpuia leh thawktu dangte an tel bawk a ni. He hunah hian Nodal Officer Vanthangpuia SDC chuan Serchhip District-a Serchhip District-a raltlante tan Biometric Enrollment drive a hmasa ber atana an tan thu sawiin, Serchhip Chanmari Veng-ah hian raltlan chhinchhiah an tlem avangin a bultanna atan an hman thu a sawi a. Chanmari VC Area-a VC te leh YMA ten an lo thawhpuina ah lawmthu sawiin, District chhunga khaw hrang hrangah he hna hi thawh chhunzawm zel a nih dawn thu leh tha taka VC leh YMA ten an lo thawhpui zel an beisei thu a sawi a. Rampawn atanga raltlan te chu kim taka chhinchhiah tum an nih thu a sawi bawk.

Ruahman lawk ang chuan raltlan te chhin-chhiahna tur Biometric Enrolment hi thla thar August 4-ah Serchhip Darnam VC area-ah thawh chhunzawm tur a ni dawn a, hemi hnu hian Ser-chhip Town chhunga VC Area hrang hrangah chhunzawm zelin August 29 khian Serchhip Town Area pawnlam ah kalpui tan leh a ni anga, VC area hrang hrang 29-a tih a nih hnuah September 22-ah zofel hman tura ruahman a ni.

Tarlan tawh angin Serchhip District-a Biometric Enrolment hna thawk tur hian District User mi 6 ruat an ni a, heng te hi Team pathum ah insiamin khaw hrang hrangah kalin raltlan te chhinchhiah hna hi kalpui a ni dawn a ni.