Hnahlan leh Champhai-ah Grape lei mek zel a ni

Hnahlan leh Champhaia Winery-te chuan kuthnathawktute Grape tharchhuah an lei mek a, Winery pahnihte hian Grape hi kg-ah Rs. 60 zela leiin Hnahlan Winery hian a man an pek zel laiin Champhai lam erawh chuan an pe nghal lo thung.

Zalen-in Hnahlan Grape Growers & Processing Cooperative Society hruaitute hnen atanga thu a dawn danin kumin hian Zirtawpni thleng khan kuthnathawktute hnen atang hian Grape rah quintal 589 an lei tawh a, Grape hi winery-ah kg khat Rs. 60 zela leiin Grape man hi pek tlak (payment) nghal zel a ni a, kumin hian quintals 1,000 vel lei theih an in beisei tih sawiin, chutih lai erawh chuan kumin hian Grape rah hi a that vak loh avangin an duh ang zat lei tur a awm lo mai thei tih an sawi. Hnahlan Winery hian Grape tui sawr sa; mahse la thun (bottle) loh hi litre 55,000 vel an la nei nia thudawn a ni. 

Champhai Grape Growers Society pawhin kuthnathawkte Grape hi tum 4 vel an lei sak tawh a. Grape man hi pe nghal lovin an bat sak hrih a, nikum lama an Grape lakna pawh an la pe thei lo niin Society hruaitute chuan an sawi a. Champhai Winery pawh hian Grape tui sawr sa, mahse la hralh loh an nei nual niin Society hruaitute chuan an sawi bawk. Champhai Winery hian Wine-a la siam loh grape tui litre 1,30,000 bakah Wine-a siam tawh litre 9,000 vel an kawl mek ni a thudawn a ni a ni.

Champhai Winery hian wine hi chi 3 an siam a, chungte chu Champ Wine, Champ Wine Premium leh Sacramental Wine te an ni a. Champ wine hi 750ml niin um khat Rs.225 in an hralhchhuak a, Champwine premium hi 375ml niin um khat Rs.112.5 in an pechhuak a. Sacramental Wine hi um khat Rs. 200 in an hralhchhuak thung a. Champwine ml 750 hi a zuartu ten Rs. 400 in an hralhchhuak a ni. Champhai Grape Growers Society hian wine an siam bakah RR Sales Delhi leh Baptist Church of Mizoram te hnenah an hralh thin bawk. Hnahlan Winery hian Grape atang hian Issabella siam chhuakin um khat 750 ml niin Rs.350 in a zuarchhawngte hnenah an pe a, hei hi Rs. 500 in an zuachhuak thung a. Hnahlan winery erawh chuan Isabella bak hmun danga hralh an nei lo thung.