Forensic Science Laboratory dinhmun thlirho

Home Minister K. Sapdanga hovin nimin khan Directorate of Forensic Science Laboratory (FSL) dinhmun thlirhona, ‘One Day Review Meeting of Forensic Science Laboratory’ neih a ni.

FSL Conference Hall-a thlirhona hunah hian Home Minister chuan FSL chu mipui leh ram inngahna, thubuai tam tak chinfelna hmun leh tunlaia thubuai chi hrang hrang chhuichhuahna kawnga innghahna bul pawimawh tak an nih thu a sawi a. Mizoram FSL pawh hmanraw tha zawk nena thuamthat a pawimawh thu te a tarlang a. Home Department hnuaia peng hrang hrangte inkarah thawhhona tha tak a awm zel a beisei thu a sawi bawk.

Directorate of Forensic Science Laboratory hian Mizoram District hrang hranga Police Officer-te tan training a buatsaih thin a, hnuchhui kawnga an thawh that avang hian kum 2023 khan Central Fingerprint Bureau, NCRB, Govt of India atangin ‘Best Case Award in Smart Use of Fingerprint Science in Investigation’ lawmman an lo dawng tawh a ni. Mizoram FSL-ah hian DNA Division siam niin India rama Civil & Criminal Case DNA Profiling ti thei Laboratory 17-na a ni a. Modernisation of Forensic Capabilitites kaltlangin Mobile Forensic Vehicles 10 leite chu endik vek an ni tawh a. Mizoram FSL thuamchakna tur hian April 3, 2025 khan National Forensic Sciences University (NFSU), Gandhinagar nen thawhhona thuthlung (MoU) ziah a ni tawh bawk a ni.