Sub-Centre leh PHC hmang tangkai turin chah

Health Minister Lalrinpuii’n natna tam tak a thlawna test theihna Sub-Centre leh PHC te tun aia hmang tangkai turin mipuite a sawm.

Health Minister hian nimin khan Aizawl-a I&PR Auditorium-ah Mizoram Diabetic Society Annual General Meeting vawi 14-na chu hmanpuiin mi tam takin pan nachang an hriat loh Sub-Centre leh PHC te hmang tangkai lehzual nise a duh thu sawiin, Sub-Centre-ah chuan natna chi hrang hrang 14 a Test theih thu leh PHC-ah phei chuan natna chi hrang hrang 60 lai a test theih thu a sawi a. Heng hi a thlawn vek a nih avangin hmun danga sum senga ti lova hman tangkai a that thu a sawi a ni.

Health Minister chuan sawrkarin mipuite an lo hrisel zawk nan natna hmuhchhuah leh enkawl kawngah kawng hrang hranga hma a lak thu a sawi a. Mipuite chu an lo hrisel zawk nan ke a kal tam turin a fuih a, ei chak zawng aiin chaw hrisel dah pawimawh zawk tura ngenin, Naupangten phone an khawih nasat avangin naupang thau, Child Obesity a tam loh nan nu leh pa te an fate phone leh a kaihhnawih an khawih hun ruahman sak thin turin a fuih bawk a ni.

Mizoram Diabetic Society Annual General Meeting hi MDS Vice President, Dr. Eric Zomawia chuan kaihruaiin Dr. Vanlalmalsawm-dawngliana, MD, DM (Cardio) in Diabetes chungchang zirtirna hun a hmang bawk a. Chawhnu lamah Free Clinic neih nghal a ni a. Zunthlum leh a kaihhnawih mahnia awlsam taka in-test-na tur hmanruate chu man tlawm zawkin kalkhawm te lei theih turin chhawpchhuah a ni bawk.

Mizoram Diabetic Society hi kum 2008-a din niin Secretary report-a tarlan danin tun thla ni 18 thlenga an Societya inziaklut hi mi 1087 an ni tawh a. An hriat theih chinah mi 200 thi tawhin an member dam mek chu mi 887 an ni.