YMA in ruahmanna siam turin sawrkar an phut

Central YMA Executive Committee (CEC) thukhawmin tunhnaia State thenawm, Assam-a dan lova Bangladesh atanga awm an hnawhchhuahte chu Mizoram-a an lo luh loh nan sawrkar chu ruahmanna siam thuai a, ILP pekchhuah kawngah fimkhur lehzual turin an ngen.

    Hemi chungchanga nimin-a thuchhuah an siamah Central YMA chuan nizan hmasa a Central YMA Executive Committee thukhawm chuan tunhnaia State thenawm, Assam-a dan lova Bangladesh atanga awm te hnawhchhuah an nih avanga lo inven dan tur a ngaihtuah tih sawiin, Assam atanga hnawhchhuah te chu thenawm State-ah te an luh lohna turin hma an la mek hlawm a. Mizoram-ah pawh engemaw zat rawn lut ve thei an nih avangin lo inven dan turah Sawrkarin ruahmanna a la siam lo a nih chuan siam thuai tur leh ILP pekchhuah kawngah pawh fimkhur leh zual turin an ngen tih an sawi a. State dang atanga dan lo a lo lut te ven kawngah ramri a awm Sub-Headquarters, Group leh Branch YMA te pawh a tul anga hma la turin an inhriattir nghal bawk a ni.