MZP in NHIDCL enkawl kawng chhe zual te tun thla chhung ngeia siamthat an phut

Mizo Zirlai Pawl (MZP) chuan NHIDCL-in an enkawl kawngpui chhe zual lai chu tun thla, July 2025 chhung ngeia Motor kal theih tura thuamthat an phut thu sawiin, Mizoram ei leh bar lakluhna kawng kal hleihtheih loh khawpa a chhiat laia chawlh la NHIDCL Executive Director chu Mizorama let leh tawh lo tura an hriattir thu a sawi bawk.

Nimin-a Aizawl Press Club-a thuthar thehdarhtute an kawmna ah MZP General Hqrs. President H. Lalthianghlima chuan MZP rorelna sang ber dawttu Federal Council vawi 59-na chuan, ‘NHIDCL hnathawh hi a that tawk loh thin avangin, a that zawk theih nan MZP-in hma la chhunzawm zel rawh se’ tia an rel thu sawiin, hemi chungchângah hian tun thla July ni 17 khan NHIDCL Executive Director Virendra Jakhar sawipui tum ni mahse chawlh a lo lak avangin an hmuh theih loh thu a sawi a. Mizoram ei leh bar lakluhna kawngpui pawimawh em em kal hleih theih loh khawpa a chhiat laia NHIDCL hotupa ber, Executive Director-in August ni 7 thleng chawlh a la daih mai chu hriatthiam har an tih thu a sawi a. Mizo mipuite hmusittu NHIDCL Executive Director chu Mizoram-a awm tlakah MZP chuan a ngaih loh bakah, a Deputation term a tawp tawh avangin a term pawhsei an remti lo tih a sawi a. NHIDCL Executive Director chu Mizoram-ah lo let leh tawh lo turin a hriattir nghal tih a sawi a ni.

MZP President chuan Mizoram ei leh bar lakluhna kawngpui pawimawh em em, a chhiat lutuk avanga kal hleih theih loh khawpa a chhiatna lai chu NHIDCL enkawl lai a nih thu pawh sawiin, “March ni 26, 2025 khan Mizoram PWD chuan Bilkhawthkir - Kolasib (Km 70-95) leh Kawnpui / Khamrang (Km 118-133) chu NHIDCL kutah a hlan a ni,” an ti a. Fur khawchhiat vanglai taka NHIDCL Executive Director-in chawlh a la chu MZP chuan mak a ti hle tih sawiin, lirthei khalhtute mangang au thawm pawh engah mah ngai lova a ral thlir mai mai chuan Mizoram mipuite an hmusit hle ah an ngai tih an sawi a.”Riltam-a Mizoram mipuite kan thih mang vek pawh pawi an ti lo-ah kan ngai. Chuvangin, MZP chuan tun (July) thla chhung ngeia NHIDCL-in an enkawl kawngpui chhe zual lai Motor kal theih tura thuam tha vat vat turin a phut a. An hmalak dan MZP in luk takin a vil dawn bakah, a tul angin a bawhzui zel dawn a ni,” an ti bawk.